Mizo Dancer in National Gold Medal la

Indian Hip Hop Dance Championship 2016 Mumbai a neih zawh takah, Eastern Region aiawha kal, Zo-Nation te chu an rawn haw leh tawh a, an member Lalhriatzela chuan National Gold Medal nen a rawn hawn. Lalhriatzela hi Eastern Region aiawha kal ve tho Arunachal Squad-a mi Abhijeet nen ṭangkawpin 2 on 2 All Style Battle-ah National Champion Gold Medal an la ta a ni. Las Vegas-a World Championship neih tur atan an qualify a, mahse an kal man tur hi anmahni an intum a ngaih avangin World Championship-a an tel theih tur leh tur loh hi a la chiang lo.

Main Category Adult Crew Division inelna a awm bawk a, mahse heta tel tum Zo-Nation te hian kalkawngah harsatna an tawh avangin an tlai a, Prelims-ah an lan ve theih tak loh avangin an tel thei ta lo a ni. Crew division-ah tel thei ta rih lo mah se Zo-Nation Leader Alan Rinawma chuan nakumah title nei thei ngei tura an let leh tur thu a sawi. Zo-Nation member te an rawn let leh takah chuan Mizo Dance Camp pawh buatsaih a ni leh tawh dawn a, June 20-July 15 inkar hian buatsaih a ni ang a, Class, Workshop, Jam leh Showcase te a awm ang. MDC 2016 atana Scholarship Audition chu June 18 hian neih a ni bawk ang.