The Flash Movie-ah Ben Affleck 'Batman' Kan hmu leh dawn

The Flash standalone movie director Andy Muschietti chuan a film buaipui mekah chuan Batman thuam dahṭha tawh Ben Affleck chuan a Batman suit chu a rawn inbel leh dawn tih a sawi a,  Michael Keaton-a 'Batman' pawh a inlan leh dawn tih a sawi bawk.

Ben Affleck hian Zack Sny­der-a film pahnih Batman v Superman: Dawn of Justice leh Justice League-ahte Dark Knight lem hi a chang a, Suicide Squad-ah a 'cameo' kan hmu bawk a ni. Vanity Fair-in an interview-naah Muschietti chuan hemi chungchang hi sawiin Affleck chuan The Flash movie-ah chuan hmun pawimawh tak a chang dawn tih a sawi. " Barry [Allen / The Flash] leh  Affleck-a Wayne-te chuan inkungkaihna lungkuai tak an nei dawn a, tunhmaa kan la hmuh ang a ni lo ang. Barry-a movie, a chanchin tarlanna ni dawn mah se heng character-te hian inzawmna thuk tak an nei a ni. An pahnihin misual kutah an nute an chan ve ve a, chu chu an inkungkaihna lungkuai tak pakhat chu a ni. Chu chu Affleck-a Batman rawn inlanna tur pawh a ni," a ti.

The Flash-ah hi 'Flashpoint' comic behchhan deuh a ni dawn tih a hmain Muschietti hian a lo sawi tawh bawk a, mahse The Flash-a a inlan dawn avang hian Affleck hian film dangah Batman lem a chan chhunzawm dawn tih sawi a awm chuang lo. Batman lema chang leh tura an sawmna a hnawl hnua The Flash-a  Batman anga a inlan leh tur hian ngaihven a hlawh hle a ni. The Flash hi  June 3, 2022-a tlangzarh tura ruahman a ni a, Ezra Miller chu The Flash lemah hian a chang leh dawn a, Affleck a inlan leh dawn bawk nen hian DCEU fan-te chuan an nghakhleh tawh hle ang.