Vanglaini Bihchianna: Entrepreneur Huang - Dairei Chips

Khumtung khaw balhla thar chhuah aṭanga kamram tui tak mai, ṭhalai leh kum naupang zawkten an duh em em balhla chips siamtu, Dairei Chips chu Vanglaini chuan bihchiang a.

Bul ṭan dan

Dairei Chips siamtu, F. Laltlandiki chuan bul an ṭan chhoh dan Vanglaini a hrilh a, "Khumtung khua hi balhla tamna khua tia hriat a ni a, balhla chips pawh hi kum 8 an lo siam tawh a, sarang-a pack-in tun thlengin an la zuar. Packaging changkang zawk leh mawihnai zawka siama hralh chhuah ve theih a nih beiseiin kum 2021-ah bul kan ṭan a ni," a ti. Hnathawktu mi pathum nen bul a ṭan a, tualchhung miten an hlutsak vangin tun thlengin mumal takin an la chhunzawm thei tih a sawi.

An tum ber

Mizoram pawn lama chips siam kan la lut nasa a, heng an chips ang zawng zawngte hi nei ve thei dawn lo mah ila, an thil siamchhuahte Mizoram pawn leh ram pawn thlenga thawn chhuah ve hi an duh leh tum a ni tih Tlandiki chuan a sawi. An thil siam hmanga Khumtung khua leh Mizoram an lo hriat lar te an duh a, hei bakah kumtin balhla tam laia loneituten rate mumal taka hralhna an hmuh loh ṭhin avanga an harsatna te sutkian a, rate mumal tak a awm ve reng theih nana hmalak an tum bawk. Khaw chhunga hna nei lote tan a tam thei ang ber hna siamsak theih an tum a ni.

Thawktu

Tunah hian hna thawktu hi pasarih an awm mek a, hmeichia paruk leh mipa pakhat an ni.

Hna thawh dan hun bi mumal taka siamin, zing dar 8:30 aṭanga tlai dar 5:00 thleng an thawk a, kartawp Sabbath leh Pathianiah an chawl thung. Hlawh hi thla biin an inpe a, chawlh lak chungchang pawh mumal takin an siam fel bawk.

Sem/zawrh chhuah dan

Dairei Chips an siam chhuah hi an super stockist, SL Family Store, Dawrpui Vengthar, Aizawlah dah thlain, anni hian a remchan dan angin an lo sem chhuak a ni.

Tunah chuan balhla chips chauh an la siam a, flavour chi hnih - Al hang (salty) leh Al hang thak (spicy) te an nei. A hang hi kum upa lamin an duh zawk a, a thak hi ṭhalai leh naupang zawkten an duh em em thung a, a hralh pawh a kal zawk.

Hmachhawp

Hmachhawp an ngah viau a, tun hnai bikah chuan coconut leh onion flavour chips hralh chhuah turin hma an la mek. Heng bakah hian balhla aṭanga siam chhuah theih - banana shake leh powder siam pawh an hmachhawp lian zingah a tel.

Harsatna tawh

Harsatna chi hrang hrang an tawk ve fo a, heng zinga lian ber chu current a nih thu Tlandiki chuan Vanglaini a hrilh.

Thingtlang lamah eng an hmu ṭha lo tlangpui a, fur-ah phei chuan an buai phah thei hle. An khawlte hi current hmang vek an nih avangin hna thawk thei loa an awm chang a awm fo a ni. Packaging ah pawh harsatna an tawk fo a, a thepna lai hriat loha lo thep hi a tam a, hei vang hian an supply lam thlengin a nghawng phah ṭhin.

Entrepreneuship chungchang

"Mahni kutkawiha eizawng, entrepreneurs kan ngaisang a, ram hmasawnna atana mi pawimawh tak an ni. Ram dang siam lak luh reng ai chuan kan ramah ngei siam a, a tam thei ang ber zawrh chhuah ve hi tum ila, kan state hmasawnna atan pawh thil pawimawh a ni a, ṭhalai tan pawh hna tam tak a siam zel thei dawn a ni. Entrepreneurship chungchang pawh school/college emaw TV lamah emaw te a tam thei ang ber awareness nei ṭhin ila, mahni kutkea ding duh a, idea ṭha deuh deuh neite paw'n hma an lak ngam zel phah dawn a ni. Hemi atan hian society an pawimawh em em bawk a, a hnual zawnga insiam lo a, a fuihtu kan nih zel theih chuan mithiam tak tak an la rawn chhuak zel dawn a ni."