Chhungkaw tana ṭangkai tur Ather Rizta tlangzarh

Ather Energy chuan kum ruk deuhthaw 450 series an kalpui hnuah Rizta an tichhuak a, nimin khan MST Motors chuan Mizorama hralh chhuah turin an showroom, Bawngkawnah an tlangzarh.

MST Motors chuan Mizoten electric lirthei kan hmelhriat chhoh meknaah mamawh phuhrutu a nih ngei an inbeisei. Ather Rizta hi khuh hawng tawh mah se hralh nghal loin mi 41-in an hauh lawk a, thla tharah pek chhuah theih an inring.

Chi hrang pathum - Rizta S 2.9 kwh Rs 1,39,206 man leh Rizta Z 2.9 kwh Rs 1,56,206 man bakah Rizta Z 3.7 kwh Rs 1,81,207 man a awm a ni. Software changkang, a khalhtute himna thlen thei tur chi hrang hrang bilh tel a ni a; mi pathum ṭhut theih tura seat hlai leh sei a nih bakah a seat hnuaiah bawm lian tak a awm tel bawk.

MST Motors chuan 2023-24 chhunga Mizo ṭhalaite tana Ather Fantasy Premier League an buatsaiha lawmmante an sem nghal bawk. Dealer Principal Zothantluanga chuan pakhatna (2,591 pts) Ramngaihawma, Ramhlun South hnenah Ather 450X HR (Rs 1,91,206 man) a hlan a; pahnihna Lalrampari Fanai (2509 pts), North Vanlaiphai chuan HP laptop dawngin pathumna Joseph Lalramnghaka (2497 pts), Kulikawn chuan tablet a dawng bawk a ni.