Hla thar leh YouTube channel thar nen Sawmtea Chhangte

Mizo Gospel singer zinga sawm hlawh ber zinga mi leh zaithiam chawimawina hrang hrang lo dawng tawhtu Sawmtea Chhangte chuan hla thar 'Hun leh ni lo danglamin' a tichhuak a, he a hla thar hi vawiin chawhnu dar 2 hian a YouTube channel thar 'Sawmtea Chhangte' -ah a dah chhuak dawn a ni.

A hla thar chu 

Sawmtea hla thar hi A.Lalchhantluanga phuah a ni a, kum 2001-a World Trade Centre sut chim a nih tlaia a phuah daih tawh kha niin kum tam tak ral hnuah Sawmtea hian a rawn sa chhuak ta a ni. MDM lamah pawh dahlut tawhin Zonet Cable channel lamah pawh pek chhuah a ni tawh bawk. Vawiin chawhnu dar 2 hian Sawmtea hian a YouTube channel thar tlangzarhna nipah­fawmin a dah chhuak dawn a; TV lama thlir hman lo tan pawh You­Tube lamah hian ngaih­ven mai chi a ni ang.

Music Video hmuhnawm tak leh en nuam tak hi  Milestone picture kut chhuak a ni a, music chu Lal K Sailo kuthnu ni thungin HC Recording-ah recording hi a ti thung a ni.

"He hla hian Total lockdown ṭantirh aṭang tawh khan min thlamuan takzet a, hripui leh lirnghing, chhiatna tamtak kan tawrh  a, ka rilru a hreawm em em laiin he hla hi ka sa chhuak ṭhin a, mak tak maiin ka thla hi ati muang hle ṭhin a, ngaithlatu mipuite pawh Pathian thlamuanna leh awmpuina lo chang ngei turin ka duhsak che u," tiin Sawmtea chuan a sawi. A YouTube channel tharah hian a hla neih tawh hote a dah dawn bawk a, a zai ngainatute chu subscribe sak ngei turin a sawm bawk.