Glastonbury-ah remna leh muanna a awm duhna lantir

Khawvel huap festival, British major event, Glastonbury Festival-ah Zirtawpni zan khan kalkhawmte chuan khawvela remna leh muanna a awm an duhna lantirin minute sarih chhung ngawi rengin an ding.

Glastonbury Festival-a pung khawmte minute khat lek chhung pawh ngawi renga awm tir tum hi thil huphurhawm tak a ni ang. Mahse Zirtawpni zan khan thil danglam tak hi thlengin, Serbian artist Marina Abramovic chuan main stage aṭanga kaihruaiin, mi sing tel pung khawmte chu remna leh muanna duhna lantirin minute sarih chhung ngawi rengin an ding a ni. Hemi chhung hian mipuite hi maimitchhingin, an bula dingte chu an darah an kuah bawk a ni.

Abramovic chuan, "Indona a thleng a, ṭam a tla a, nawrh huaihawtna a thleng a, inthahna a thleng reng bawk a ni," tiin pung khawmte chuan khawvela danglamna thlen turin midangte induhsakna leh inhmangaihna an lantir a ngai tih a sawi. Hemi hnu hian khuang rawn vaw riin, a ngenna angin kal khawmte chu minute sarih chhung an bula mite kuahin ngawi rengin an ding a ni.