Wuhan pool party

Kum 2019 thlahliam tur leh Krismas vuakvet boruak inlumlet chho ṭana khawvel hmundang an buai mup mup lai leh khawvelin ni a hel dan ngaia a hel mawp mawp lai khan China khawpui pakhat, China khawpui zinga mipui cheng tam pakuana ni pha, Hubei Province-a khawpui lian ber ni bawk; Wuhan-ah chuan khawvelin a la hriat ngai loh hri danglam tak mai chuan a hap theih apiang a lo hap ve bawk a, chutih lai chuan engtiang takin nge khawvelin chu hri chu a hmachhawn dawn tih tumahin an la hre lo.

A nihna takah chuan China sorkar ngei pawhin a tirah chuan a ngaihven lutuk lo a, Hong Kong 'extradition bill' vanga an ram buaina chu a bengkhawn zawk a ni.

Wuhan aṭanga inṭan hri chu a tirah chuan coronavirus chi khat tiin an sawi mai a, an beisei aiin a darh chak a, January thla chawhnu lam a inher meuh chuan mi 500 chuangin an kai tawh a, mi 17 an thi tawh bawk. Sorkar tan bengkhawn loh chi a ni tawh lo a, January 23-ah phei chuan Wuhan khawpui chu kalpawh theih loh turin a khar hial a, khawpuia luh leh chhuah a phal lo zui.

Mahse chu hripui chu a lo inmung nasa tawh lutuk a, Hubei province chhungah chuan nasa takin a lo darh hman a, kar loah khawvel a fan chhuak a, kumin March thla a rawn inher chhuah meuh chuan khawvelin a aia buaipui a nei ta lo a, Wuhan-a hri leng chuan khawvel a deng chhuak ta der mai. Chu chuan vawiin thleng hian khawvel a chawk buai a, nunphung pangngaiin khawvel a kal thei ta lo a, khawvel mihring tam ber chuan thil dang zawng aiin 'damchhuah' an tum ta ber a ni.

Kumin atana India ramin Kumpinu rorelna lak atan kan zalenna ni champha kan lawm meuh chuan khawvelah he hripui avanga thi hi mi nuai sarih chuang an awm tawh a, hri dona atan hian khawvelin a man pawh a pe sang hle. Sum leh pai maiin a man a pe lo a, tha mai a ni lo, nunna nuai sarih chuang a pe tawh.

Chutiang khawpa hri vanga khawvel a buai mup mup lai chuan hripui hringchhuaktu khawpui Wuhan-ah chuan nunphung a pangngai leh tawh lawmna atan Wuhan Maya Beach Water Park-ah pool party an lo buasaih hep hep mai a, an party thlalak leh video chu internet lamah nasa takin a darh a, khawvel mit a tikham hle.

Party-naa kalte hian social distancing an kalpui lo tih a chiang a, tumahin hmaituamna pawh an vuak hek lo, a hmei a pain an lam mup mup mai a ni. Media hrang hrangah sawisel a hlawh hle a, The Daily Telegraph phei chuan an phek hma berah Wuhan pool party thlalak chu lian taka tarlangin,"China's big party," tih headline-a hmangin, "Khawvelin hripui man a pek laiin Wuhan-a beach-ah nun an chen(life’s a beach in Wuhan as world pays virus price)," tiin na takin an sawisel. Chumai a ni lo social media comment pakhat chuan,"Khawvel hmun dang zawng hmaia benna a ni," tia sawiin engmah thleng lo anga nawmsip bawlah a puh. Ṭhalai social meida khawih ṭhinte chuan memes leh troll vel pawh kan hmu nualin a rinawm.

Khawvelin a dem rawn lai hian China media-te chu an rawn inrawlh thuai a, Wuhan pool party chu nunphung a pangngai leh tawh tih lantirna a ni, tiin Wuhan thlavang an rawn hauh nghal.

China chhuak English tabloid Global Times chuan an editorial thlengin Wuhan thlavang hi an hauh a, pool party satliah a nih loh thu leh Covid-19 hri len ṭanna hmunah chuan khualzin an lo lawm leh tawh tih leh economy a nung thar leh ṭan tih lantirna a nih thu an ziak.  

Twitter lama zawhna an chhannaah pawh ni 76 chhung lai an inkharkhip thu leh hemi chhung hian khauh takin an kalpui a nih thute pawh an sawi.