Khiangte Construction Ṭhazual Lengzem : Mendal 'Pialral' in hma a hruai

Mendal chuan 'Pialral' hla hmangin Khiangte Construction Ṭhazual Lengzem chart tharah hma a rawn hruai.

'Pialral' hla hi Mendal leh Young Fella te phuah niin, music & recording hi Smiley Records-ah tih a ni a, video hi Osiama Pictures kut chhuak a ni. Music video hi Josue Production in a sponsor a ni bawk. He hla hian thihna avanga hmangaih chan natzia leh, inṭhenna awm tawh lohna pialrala hlim taka len dun hun a nghahhlelh zia a rawn tarlang a ni. A hmangaih ber vawn tlat a duh laia khuanun a chan tura a duanah erawh vui thei a ni si lo, a hmangaih tel loa riang taka nun a paltlang chhoh tur thu chu lungrun takin Mendal-a hian he hla hmang hian a rawn puang chhuak a, ngaihthlatute rilru a khawihin, an lunglen a kaitho ngei ang. YouTube-ah pawh view a pung chak hle.

Aw mawi danglam tak nei, Grace 10:45 'A vulmawi si' tih pawhin hma sawn zelin No 2-ah a rawn chho a, chart-ah hun eng emaw chen a lanpui tawh a ni. Mic Khan 'Ka neihchhun' pawhin hma rawn sawn zelin, No 6 aṭangin No 3-ah a rawn inhlangkai ta bawk. Asanga Project ft Ruth Tochhawng 'Min en teh' leh The Radio 'Tha chungchuangi' te pawh Top 5-ah an lang bawk a ni.

Ṭhazual Lengzem chart tharah hian Zothana leh HT Lalthanzami te an la lang chhunzawm zel a, hetih lai hian lang thar pathum - Smiley, Drac Frost leh David Darlong te an awm bawk.