Billboard 200 : 'Tortured Poets Department' in kar 10 chhung ro a rel ta

Billboard 200 album chart-ah Taylor Swift album thar ber, 'The Tortured Poets Department' chuan a zawnin kar 10 chhung No 1 dinhmun a hauh ta.

'The Tortured Poets Department' nen hian, kum 34 mi superstar Swift hian chart chung berah a album pathum chu kar 10 chhung a chung ber dinhmun a hauhpui thei ta a ni. Hemi hma hian '1989' leh 'Fearless' te chu No 1 ah hian kar 11 ve ve an lo lang tawh. 'TTPD' hi January - March, 2021-a Adele '21' album-in a zawna kar 10 chhung No 1 a nih hnua hmeichhe artist album zinga he dinhmun rawn thleng leh thei hmasa ber a ni bawk.

'TTPD' hian kar liam ta chhungin US-ah equivalent album unit 115,000 neih belh lehin, album-a hla 31 te hian on-demand official stream mtd 113.21 an nei bawk. Traditional album sales hi 28,000 a la nei tling.

No 2-ah Gracie Abrams 'The Secret of Us' a rawn lang a, chart-a a la thlen san ber ṭum leh, Billboard 200 Top 10-ah a lan hmasakna ber a ni. Equivalent album unit 89,000 a nei a ni.

Morgan Wallen 'One Thing at a Time' chu No 3-ah rawn chhoin, equivalent album unit 73,000 a nei a, Billie Eilish 'Hit Me Hard and Soft' chu No 4-ah tla thla thungin, equivalent album unit 70,000 a nei. No 5-ah Peso Pluma 'Exodo' a rawn lang ve bawk.