WhatsApp-a green verfication mark rawng pawlin thlak dawn

WhatsApp chuan an application-a verified business leh channel-te verification mark atana rawng hring an hman ṭhin chu rawng pawlin an thlak dawn. Hei hi Meta platform dang - Instagram leh Facebook nena in ang tlanga kalpui a tum vang a ni.

Verification checkmark rawng a thlak thar hi beta user ṭhenkhat, WhatsApp update thar ber install-ten an hmang thei tawh a ni. A nawlpuiin an hman theih tura tih chhuah thuai a tum.

WhatsApp hian feature thar siamin hma a la reng a, tun hnaiah AI chatbot, Meta AI pawh hman theiha a chhawp chhuah hnuah, user-ten AI avatar an siam theihna tur pawh a buaipui mek. AI chatbot hi WhatsApp, Instagram leh Messenger-ahte a awm tawh a ni.

WABetaInfo-in a tarlan danin, WhatsApp-a AI avatar siam theihna feature thar hi WhatsApp Beta version-ah enchhin mek a ni. He feature hmang hian user chuan thlalak leh text a thawn ang a, Meta AI Llama model chuan a image hi a lo siamsak dawn a ni. He image hi an duh lo a nih pawhin Meta AI settings atangin an duh hun hunah an paih leh thei dawn bawk a ni.