'Thih thlengin aw' a en theih dawn ta

Mizo film danglai, psychologicial horror movie, 'Thih thlengin aw' tih chu zanin dar 7 hian Vanapa Hall-ah tlangzarh a ni dawn a, Lersia Play-ah chhawp chhuah nghal a ni bawk ang. Tlangzarhna hmuna en duh tan ticket hi Rs 100 man chauhin an siam.

'Thih thlengin aw' hi OBG Production kut chhuak a ni a, Kima Renthlei (OBG Production) chu director niin, script writer hi Vanlalawmpuia (opix renthlei) a ni a, 'Awma ka ni' tih film/script pawh lo ziak tawhtu a ni. PC Lallawmzuali chu cor-writer niin, movie-ah hian a chang bawk.

He film-ah hian Mizo lemchan thiam kan hriat lar tak takte an inlan nual. Actor ṭha, Best Actor Award pawh a zawna lo dawng tawh Papuia Pachuau chu a changtupa ber niin, PC Lallawmzuali chuan a changtunu role a chang dawn a, Zuali Chhangte leh Mary Kim te an chang bawk a ni. Anni bakah social media lama hriat hlawh tak tak, lemchan lama mi tharte pawh kan hmu nual dawn bawk a ni.

Horror movie kan lo hmuh ṭhinte nen a danglam dawn a, story ṭha leh clinical taka duan niin, horror movie-a scene kan hmuh zen zen ngai loh tichhuak hmasa ber tur niin, danglam tak leh dangdai tak an rawn chhawp chhuak dawn a ni. A script hi kum 2021 aṭanga an buaipui ṭan a ni tawh a, kumin February thlaah shooting hi an zo a ni.