Khiangte Construction Ṭhazual GOSPEL : Hma hruaitu Cindy & Puipuia

Gospel artist kan neih ṭhat ber zinga mi, Cindy Lalthanpuii leh Puipuia Chhakchhuak te zai dunna, 'Kan phal thei lo' tih chu Khiangte Construction Ṭhazual Gospel chart thar bera hma hruaitu a ni.

'Kan phal thei lo' tih hla hi Dr Zaua leh Ramdina te phuah niin, a hmain Ramdina leh Pensy-ten an lo sa tawh a, tunah Cindy leh Puipuia hian Cindy pa leh Puipuia pu te hriatrengna pualin an rawn sa ve leh a ni. Kumin May 10 khan YouTube-ah an dah chhuak a a, an zaithiamin an sa urhsun a, pa chan tawhte mittui a ko chhuak hnem ngei ang. Recording hi HC Records-ah tiin, music hi Thangbawiha kut chhuak a ni a, music video hi RDS Shots siam a ni.

Mizo Idol aṭanga kan hriat lar, aw ṭha tak nei Tumtumi pawhin hma sawn zelin, 'Ka inchhuang ṭhin' tih chu pahnihnaah a rawn lanpui. Pathumnaah Vanlalruati 'Halleluiah' awmin, Christina Vanlalnghaki 'Fapa sawm aia hlu' tih chu chart hmasaa No 9 aṭangin No 4-ah a rawn invawrh chho a, Divine Voice chuan 'Malsawm ang che' tih hmangin Top 5 an rawn khar.

Ṭhazual Gospel chart tharah hian Angela Lalremruati leh Dizie & Pekpeki pawh an la lang chhunzawm zel a, hetih lai hian chart-a lang thar - Seraphic Choir, Priscilla L Fanai leh Malawmi te an awm ve bawk.