Mel B hnenah Honorary Doctorate degree hlan dawn

Spice Girls singer, Melanie Brown, Mel B tia hriat lar chu inchhung khura kut tuar ṭhinte tana a hnathawh ṭhat avangin Leeds Beckett University chuan honorary doctorate degree a hlan dawn.

Charity Women's Aid patron ni mek, Mel B hian inchhung khura kut inthlakna thleng ṭhin a tawp theihna tura theihtawpa hma la in, kut tuar ṭhinte tan a thawk bawk a ni. Leeds Beckett University hian tun thla tawp lamah Mel B hnenah honorary degree hi an hlan ang. University Vice Chancellor Peter Slee chuan Mel B inpekna hi a fak hle a, harsatna tawkte tana a platform ṭangkai taka a hmang chu lawmawm a tih thu sawiin, an chhuang hle tih a sawi. Mel B hi domestic abuse tuartu a ni ve bawk a, hei vang hian amah anga harsatna tawkte tan hian hma lain, kut tuar ṭhinte pawh ngawih bosan loa ṭawng chhuak turin a fuih fo ṭhin.