Parema Night-ah Scar Project

January 2 zan khan hla phuah thiam Parema puala hun buatsaih, 'Parema Night' chu Heritage Lounge ah buatsaih a ni.

Robert Lalduhzuala'n he hun hi kaihruaiin Parema hla phuah satute bakah Mizorama zaithiam langsar tak takte'n hun an hmang.

Parema hi cancer natna vei a ni a, he hun pawh hi cancer veite puala buatsaih niin Dr K Lalfakzuala, cancer specialistchuan cancer awareness programme hun a hmang a; he mi zana sum tling khawmte hi Cancer Foundation Care-ah chhunluh vek a ni ang.

Zaithiam langsar tak tak an zai a, Parema hla phuahte leh Pathian hla ṭha dangte an sa a, an zai tuiin mipui rilru a khawih hle a ni.

He hunah hian Mizorama a vawi khatna atan 'Scar Project' neih a ni a, hei hi cancer veite'n an natna hneh tuma anmahni leh midangte tana thlalak an phochhuahna a ni.

Scar Project :

Mizoram mai ni lo, India ramah chuan Scar project hi thil thar a ni. Khawthlang ram ṭhenkhatah chuan cancer veite'n an natna hnehna thlalak an pholang ṭhin a, hei hian anmahni ang bawka cancer veite a cho chhuah a, he natna hneh tura an 'fight' theihna tura fuihtu-ah an hmang.

Mihringin kan ser neihte kan thup hram hram ṭhin a; nimahsela mahni hmel lang chunga cancer ser (scar) thlalak an phochhuah chhan chu: Cancer dangte leh mipui nawlpui hnenah (1) Rap lo kan taksaa ser kan pawm theihna atante (2) Cancer vei. abikin naupang lam deuh ten piangsual nia an inhriat tlatna avanga rilrua harsatna an tawh sutkian nan (3) Miin beiseina an lo neih phahna atan te, cancer vei tirte pawhin he natna aṭang hian a dam theih tih an hriatna atan (4) Ser zahpui loa 'survivor scar' a ni tia an lo chhuan zawk theihna atante an ti a ni.

Thlalak thawh tute hian an hreh ve hle a, an ṭawngtai hnuah midangte tana malsawmna a nih beiseiin an inzaina hnuhma thlalakte an phochhuak ta a ni.

Gaby Ngente hmalaknain 'Scar Model' an tihte chuan an serte hi midang tana beiseina siamtu a nih beiseiin thla an la a, cancer vei midangten 'positive thinking' an lo neih a, an serte zahpui mai loa 'Kan la mawi tho a ni' tiin midang-te cho chhuah tumin an hmel an phochhuak ta a ni. Heng thlalakte hi Heritage Lounge-ah en theih turin tar chhuah mek a ni.

Heng Scar Model-te hi an hmin ah 'Cancer Pasaltha' tiin Thangchhuah puanhlan an ni a, chawimawina Nopui hlan anni bawk.

Scar Project chungchanga a hmalatu R Lalramengzami hi Mizoram Cancer Care Foundation a Vice president ni lai mek niin, amah hi hnute cancer a vei hnua kum nga chhung ṭha taka dam leh tawh a ni a; amah leh a thawhpuite hian an cancer vei midangte ṭanpuiin theihtawpin ṭan an la a ni.