Mipa zingah Drake a turu ber

US bikah chuan zaithiam mipa zingah Drake a ropui ber a, Justin Bieber-a record siam pawh a rawn khum. Mipa zingah Billboard Artist 100-a pakhatna hauh rei thei ber a ni a, mipa leh hmeichhe zingah chuan pahnihna a ni.

Drake hian chawlhkar 12 chhung zet pakhatna a hauh tawh a, Justin Bieber a khum tawh a, Justin Bieber hian pakhatna vawi 11 a hauh thei. Drake hian tluk loh pakhat a la nei a, chu chu Taylor Swift a ni. Taylor Swift hi a lo turu zek a, pakhatnaah chawlhkar vawi 31 chhung a awm a ni. Adele chu palina a ni a, chawlhkar 10 chhung Billboard Artist 100-ah hian pakhatna a ni a, The Weeknd chu chawlhkar riat chhung pakhatna niin, panganaah a lang pha.

Drake hlawhtlinna ber chu physical sale emaw, digital lam ni loin streaming lamah a ni. A music hralh zaa 46 zet hi streaming a ni a, digital chuan dawtin 23% a ni. Zaithiam zinga streaming hlawkpui ber a ni a, a dawt chu Beyonce niin, Bieber, Rihanna leh Ariana Grande te chu a hlawhtling dangte an ni.