OnePlus 3 a chhuak ta

OnePlus phone chhuanvawr, an flagship phone OnePlus 3 chu an tichhuak ta a, e-commerce site lamah pawh hmuh theih a ni tawh. OnePlus phone tihchhuah tawh zingah chuan a man a to ber a, Xiaomi Mi 5 leh LeEco Le Max 2 te nena khaikhin theih tak a ni a, a man leh a ṭhat danah pawh a intluk tlang viau.

OnePlus 3 hi Rs. 27,999 man a ni a, a hmai hi inchi 5.5-a hlai a ni a, resolution a ṭha khawp mai a, 1080 x 1920 pixels niin, pixel density hi 401 ppi a ni. A display type hi AMOLED a nih avangin LCD naran te ai chuan power a heh lo fe zawk. Processor hi Qualcomm Snapdragon 820 a ni. A RAM pawh a ṭha hle a, 6GB zet a ni a, game khel ṭhinte tan game lian tak tak pawh a khelh ngam zan dawn a ni. OS version-ah hian iOS emaw, Android emaw hmang loin OxygenOS 3.0 a hmang. Inbuilt memory a lian khawp mai a, 64GB zet a ni.

Battery hi 3000 mAh a ni a, GPS bakah GLONASS te nagivation system atan a hman theih. A phone hnung lama camera hi 16MP lai a ni a, a hma lam, selfie-na tur ang chi phone pawh a chhe lo hle a, 8MP a ni.