Pensy-i'n kumtharah hma a hruai
December thla kha chuan pahnihnaah a awm a, kum a thar meuh chuan pakhatnaah a rawn invawrh kai thei ta. Pensy B. Lalthangliani hla, 'Chhan tlak ka ni em' tih chu Dafodils Ṭhazual Faknaah pakhatna a rawn hauh.
He hla hi Parema (Lalremruata) phuah a ni a, 'Ka Rinchhan Lalpa' album-a mi kha a ni. He album-a hlate hi a ṭha hlawm hle a, Gospel music lamah chuan he album tluk hi kum 2014 chhunga chhuakah khan a awm âwm lo e. He album aṭang hla mala tihchhuah hoten Ṭhazual Faknaah pakhatna an hauh thei deuh sup a ni.
Pensy-i hi Dafodils Ṭhazual faknaah hian mi thar a ni lo a, pakhatna a lo hauh fo tawh a ni. Nikum khan 'I hnenah ka lo kir e' tih hla hmangin, March 17 thleng khan pakhatna a hauh a, hemi hnu hian C. Lalzarmawia phuah, 'Nitinin hmangaih che ka duh' tih hla hmangin July 7, 2014 aṭang khan pakhatna a hauh leh a, he hla hmang hian Dafodils Ṭhazualah pakhatna ṭum li zet a lo hauh tawh bawk.
'Chhan tlak ka ni em' tih hla hi a thluk a nalh a, a thu a ṭha a, Pensy-i hi a zaithiam bawk a, pakhatnaa a awm pawh hi a mawh hauh lo. November 10 aṭang khan Dafoldils Ṭhazual 10-ah hian panganaah a rawn lang ṭan a, pakhatna hauh tur hian hun a duh rei lo hle a ni.
Pahnihnaah TBC Zaithanpuia sak, 'Fak zel che ka duh' tih chu a rawn lang ve ta bawk. A hmain he hla hi panganaah a awm a, hma a sawn chak hle a ni. Pathumnaah a hmaa pakhatna, Lalhlumawii sak 'Lei leh van siamtu' tih chu a awm a, he hla hi a ropui a, a satu hian Idol aṭang khan huhang a ngah chho hle tih a hriat.
Hmingtea leh Nutei Sailo te hla 'Kir leh rawh' tih chu a ngai, palinaah a awm. Temi Sailo hla, 'Kraws thu' pawhin hma a sawn chho zel a, tunah chuan panganaah a lang ta. Biteii leh Kimkimi te hla, A Riang Chuang Ngei e, tih chu Krismas boruak a liam a, kum tharah chuan a liam ve ta. Angela Lalremtluangi chu a hla, Min Hrilh Fo Rawh tih nen top 10-ah a rawn lang thar e.
Dafodils Ṭhazual Fakna
10 Amtea - Ka nghing lovang
9 Maggie - Min siam thar leh rawh
8 Bethsy & TBC Zaithanpuia - Isua ka thian a ni
7 Angela Lalremtluangi - Min hrilh fo rawh aw - Lang thar
6 Lancy - Min hruai zel thin
5 Temi Sailoi - Kraws thu
4 Hmingtea & Sailo Nutei – Kir leh rawh
3 Lalhlumawii - Lei leh van siamtu
2 TBC Zaithanpuia – Fak zel che ka duh
1 Pensy - Chhan tlak ka ni em ni