The Hobbit a la pangngai reng

Kumhluia chhuah kha ni mah se, kum a thar hnuah pawh The Hobbit: The Battle of the Five Armies chu pakhatnaah a la awm.

The Hobbit: The Battle of the Five Armies hmangin kumhlui box office kan khar a, kumthar box office pawh he movie nen tho hian kan hawng leh. The Hobbit thar ber hian $mtd21.9 zet lak belh lehin, US box office aṭanga sum lalut hnem ber pakhatna a hauh leh a ni.

Kar tawp chhung khan movie thar ṭhahnem tak a chhuak a, movie kal lai, hit tak tak a awm bawk. Into The Woods te, Unbroken te a lian viau nain, The Hobbit lehthal tur chuan an chak tawk lo. The Hobbit thar ber hian $mtd220.8 zet a lalut tawh a ni.

Pahnihnaah Into The Woods a awm a, he movie hian $mtd19.1 a lalut. He film-ah hian filmstar lar an chang hnem hle a, Oscar winner Meryl Streep te, Anna Kendrick, Emily Blunt leh Chris Pine te an chang a ni. Pathumna hauhtu hi Angelina movie siam, Unbroken a ni a, box office top 10-ah hian hapta hnih chhung a lang ta. Kar tawp chhung khan $mtd18.4 a hlawh chhuak.

Film thar, The Woman in Black: Angel of Death chu palinaah a awm a, a siamtute beisei aiin a che ṭha. Kar tawp chhung khan $mtd15.1 a hlawh chhuak a, an beiseinaah erawh chuan $mtd9 aṭang 11 vel chauh a ni. Entu zingah hmeichhia an ṭhahnem a, zaa 53 lai an ni.

Box office top 10

"The Hobbit: The Battle of the Five Armies"

- $mtd21.9

"Into the Woods" - $mtd19.1

"Unbroken" - $mtd18.4

"The Woman in Black: Angel of Death" - $mtd15.1

"Night at the Museum: Secret of the Tomb" - $mtd14.5

"Annie" - $mtd11.4

"The Imitation Game" - $mtd8.1

"The Hunger Games: Mockingjay, Part 1" - $mtd7.7

"The Gambler" - $mtd6.3

"Big Hero 6" - $mtd4.8