Dafodils Ṭhazual faknaah mipa an lang tlem
Pensy-in pakhatna a luah ngun ber
Kum 2014 chhungin Dafodils Ṭhazual Fakna chart bik hi vawi 26 tihchhuah a ni a, Pensy chu mimala pakhatna hauh ngun ber a ni a, vawi li a hauh. Mipa lang an tlem a, Chris MS Dawngkima, Lawma leh TBC Zaithanpuia te chauh pakhatnaah hian an lang.
Mizo hmeichhia, gospel singer hlawhtling kan ngahin kan nei ṭha hle a, lengzem nena lak kawp pawh nise gospel huanga hmeichhe zaithiamte hi a hlawhtling ber ber an ni. Gospel huang chhungah hian zaithiam an ṭhahnemin an ṭha hlawm tih a hriat hle a, mi pakhatin pakhatna rei tak an hauh meuh lo a, ṭum hnih pakhatna hauh an awm nual a, Pensy B. Lalthangliani hian
ṭum li pakhatna a hauh thei a ni.
Pensy-i hian 'Nitinin hmangaih che ka duh' tih hla. C. Lalzarmawia phuah hmangin Dafodils Ṭhazual Fakna chart-ah ṭum lo a zawnin pakhatna a hauh. July 7 aṭang khan he hla hmang hian pakhatna a hauh ṭan a, July 21, August 4 leh August 18 thleng khan pakhatnaah hian a awm zui. September 15 thleng top 10-ah a lang zui a ni. Pensy-i hi hemi hnu hian, October 11
aṭang khan 'Chhan tlak ka ni em ni' hla hmangin Dafodils Ṭhazual Faknaah hian panganaah a rawn lang leh a, kuminah phei chuan he hla hi pakhatnaa awm hmasa ber a ni ta nghe nghe.
The Chosen-a an vocalist pakhat, Mawitei chu Dafodils Ṭhazual Fakna 10-a pakhatna hauh ngun ber dawttu a ni a, vawi thum pakhatna a hauh. A hla sak, 'Ka thlang ber zel ang che' tih hi Parema phuah a ni a, Ka Rinchhan Lalpa album-a mi a ni. Mawitei hi May 26
aṭang khan pakhatnaah a awm ṭan a, June 9 leh June 23-ah te pakhatna a ni zui leh a, Pensy-i hian Nitinin hmangaih che ka duh tih hla hmangin pakhatna hi a rawn luahlan ta a ni. Mawitei hi September 1 thleng khan Dafoldils Ṭhazual Fakna 10-ah hian a la lang zui a ni.
Hlimhlimi hi pahnihna a ni bawk. Ṭum thum pakhatna a hauh. January 20, 2014 khan Hlimhlimi hi 'Ka lo hmu ta' hla hmangin pakhatnaah a rawn lang a, February 2-ah pakhatna a hauh leh a, hemi hnu hian Duhsaki 'Aw hmangaihna' a rawn lang zawk a, March 3 khan Hlimhlimi hian pakhatna a rawn hauh zui leh a ni.
Mipaah, mimalah chuan Chris MS Dawngkima'n pakhatna a hauh ngun ber a, ṭum hnih pakhatna a hauh. Musician leh composer, Chris MS Dawngkima hian 'Kawng min hawn ru' hla hmangin ṭum hnih pakhatna a hauh a, April 28 leh May 12 te khan he dinhmun hi a hauh. TBC Zaithanpuia hian pakhatna hi ṭum thum a hauh a, mahse ṭum hnih hi Bethsy-i nen a ni a, an hla sak duh, 'Isua ka ṭhian' tih kha a ni. Pakhatna hauh thei mipa hi pathum chauh an awm a, mimalah Chris MS Dawngkima'n ṭum hnih pakhatna a hauh a, TBC Zaithanpuia'n a malin ṭum khat leh Bethsy-i nen ṭum hnih a ni. Lawma'n a farnu Judith-i nen
ṭum hnih pakhatna a ni bawk.
Dafodils Ṭhazual Faknaah hian pakhatnaah hming 15 a lang a, chung zinga 12 ngawt chu hmeichhia an ni. Top 10-ah hrim hrim chuan mipa lang an awm nual a, Hmingtea, Lalruatfela Pachuau, Mahruaia, Vanlalmalsawmkima leh midang an awm nual. Band emaw, group emaw lang an tam lo.
Pakhatna ṭum hnih hauh thei, tarlan tawh bak hi an awm nual a, Lawma leh Judith-i te hian 'I hming ropui hmangin' pakhatna ṭum hnih an hauh a, Bethsy leh TBC-a te hla 'Isua ka ṭhian' tih chu a ni bawk a, Lalhlumawii hla 'Lei leh van siamtu' chu ṭum hnih a lang bawk.