Transformers tharin sum a lalut hnem

7th January, 2015

Frozen sum lalut hnem berte zingah a lang

Transformers film thar ber, nikuma tihchhuah, Transformers: Age of Extinction kha kum 2014 chhunga movie chhuak zinga sum lalut hnem ber a ni a, nikum kumtir lama hit em em, Frozen chu movie tihchhuah tawh zawng zawng zinga sum lalut hnem berte zingah a lang bawk.
Frozen hi nikum chhunga sum lalut hnem bera a lan lohna chhan chu kum 2013-a tihchhuah kha a ni a, kum 2013 chhung kha chuan khawvela movie zinga sum lalut hnem ber a tling.
Transformers: Age of Extinction hian nikum chhung khan $1087,404,499 zet a lalut a, he film siam nana an budget chu $mtd210 a ni. The Frozen film hian $1,277,152,791 a lalut thung.
Movie tihchhuah tawh zawng zawng zinga sum lalut hnem ber chu Avatar kha a ni a, $tld2.788 a lalut. A dawtah Titanic niin, $tld2.186 a lalut a, The Avengers chu pathumna niin, $tld1.518 lalutin, Harry Potter and the Deathly Hallow Part 2 chu palina a ni a, Frozen hi pangana a ni.
Pawisa hlutna tlahniam leh san aṭanga chhut chuan kum 1939-a tihchhuah daih tawh, Gone with the Wind kha sum lalut hnem ber a ni a, a dawtah Avatar awmin, Star Wars chu pathumna a ni a, Titanic palina niin, The Sound of Music chu pangana a ni.
Film, chhunzawmna awm chi, franchise-ho zingah chuan Harry Potter-in sum a lalut hnem ber. Harry Potter thawnthu chhungah hian movie pariat lai a awm a, hengho zawng zawng sum lakluh hi $tld.7.7 zet a ni a, Deathly Hallow Part 2 kha a mala sum lalut hnem ber a ni a, $tld1.34 a lalut. Marvel-ho hi pahnihnaah a awm. Marvel cinematic-ah hian movie 10 lai a awm a, heng movie-ho sum thawh chhuah hi $tld7.15 a ni. Marvel zingah hian The Avengers chu sum thawk chhuak hnem ber niin, $tld1.51 zet a thawk chhuak a, a dawtah Iron Man 3 a ni.
James Bond-in $tld6.15 a lalut tawh a, film 25 zet a awm a, Skyfall kha a mala che ṭha ber a ni. JRR Tolkien-a lehkhabuho behchhana film siam pasarih a awm tawh a, $tld5.64 lalut tawhin, a malah chuan The Lord of the Rings: The Return of the King ($1,119,929,521) kha sum lalut hnem ber a ni. Film pasarih awmna Star Wars chu panganaah a awm.