Kum 2014-a movie chhuak zingah Captain America-ah tihsual a tam ber

Hmuhnawm ti taka i thlir dauh dauh lai khan ṭhenkhat chuan movie-ah hian tihsual an lo châng ve thung. Nikum chhunga movie chhuak hrang hrang zingah khan Captain America: The Winter Soldier-ah tihsual a tam ber.

Tihsual an thlir dan hi chi hrang hrang a awm a, inzawm fuh chiah lo, continuity mistake te, a kum leh a hunlai mil lo deuh thil lo awm ve, plot hole te, character mistake, revealing mistake tihte tam tak a awm. Captain America: The Winter Soldier-ah hian tihsual 55 lai a awm a, Divergent chu a dawttu niin, 26 a awm a, Transformers: Age of Extinction-ah khan 25 a awm bawk.

Captain America: The Winter Soldier-a tihsual nia an tarlan zingah chuan, Bucky in Fury kawtthlera thah a tum lai khan shot leh shot inkar ni (sun) awm dan a inang lo a, hei bakah hian Steve leh Natasha te sipai campa an kal laiin chhûn a ni a, a chhung an luh erawh chuan zan a ni leh thut thung. Hengte hi continuity mistake an ti a, Captain America-ah hetiang hi a awm nual. Plot hole zinga an sawi pakhat chu bunker-a computer-te Natasha chuan 1970 bawr vela an siam vek niin a sawi a, mahse interface up to date thar deuh, memory stick vuahna tur a awm. Character mistake tarlan zingah, Smithsonian-ah Steve chuan a ṭhianpa Bucky chanchin a chhiar a, chutah chuan a tirah kum 1916-a piang angin a lang a, mahse a tawpah erawh chuan 'Bucky Barnes: 1917 - 1944' tih a lang leh thung. Factual error ṭhenkhat zinga langsar chu Nick Fury te inûm laiah, an inûmna hi Washington DC anga tarlan a ni a, a dum leh vara state highway 6 sign hmuh tur a awm. Hei hi US-ah chuan Ohio-ah bak hmuh tur a awm lo.

Transformers: Age of Extinction-a thil dik lo, factual error chiang em em chu HongKong-a motor-a driver seat a ni. He film-ah hian driver chu motor veilama awm anga tarlan a ni a, Hong Kong-ah hian driver seat dinglamah vek a awm.

Film tam takah hetiang mistake hi hmuh tur a awm nual The Fault in Our Stars-ah mistake 16 a awm a, Teenage Mutant Ninja Turtles-ah 13 a awm a, Need For Speed-ah 11, The Lego movie-ah 10, Godzilla-ah 9 a awm bawk.