Electronic-a hralh a pung

Hard copy lam khawvelin a kalsan nasa deuh deuh tih US aṭang hian a hriat. Kum kalta chhung khan US-ah chuan movie leh TV show-te electronic sale a pung nasa hle a, a punna hi 30% zet a ni. Heng hralhna aṭanga sum hmuh hi dollar tluklehdingawn 1.6 zet a tling.

Kum 2013 khan electronic sale aṭanga sum hmuh kha $tld1.2 a ni a, nikum kha chuan $tld1.6 a tling chho ta a ni. Hetianga digital-a hralh a pun chhoh tak hluaina chhan pakhat chu film hit tura ngaih, vauna leh tihṭhaihna avanga tihchhuah ngam leh tak loh, The Interview theatre-a tichhuak lo a, digital sale-a dah chhuah a nih vang pakhat a ni.

Disc ni lo, internet-a download theiha hralh chhuahho pawh a pung a, nikum chhung khan $mtd533 man hralh a ni. Hetihrual hian US-a chhungkuatena entertainment lam thila sum an sen chu kum 2013 aiin a tlem zawk. Kum 2014 khan $tld17.8 an seng a, hei hi kum 2013 aiin zaa 1.8-in a tlem zawk a ni.

DVD leh Blu-ray hralh a tlahniam nasa a, kum 2013 aiin 11% zetin a tlahniam zawk. Video hawhna dawrten $mtd696 lai an thawk chhuak a, mahse hei hi kum hmasa aiin zaa 27-in a tlem. Chhungkaw tam berin digital lam an hawi tak zawk avangin video CD hawhna dawr aṭanga hawh chhuah hi a tlem phah niin alang.

Hetihlai hian subsciption anga kalpui, Netflix angte erawh an ṭhang nasa hle. Netflix bik hian fourth quarter chhung ringawtin subscriber hi 25% zet an neih belh a ni.