Kyusho Waza-an video tichhuak hnai

Kyusho Waza tia kan hriat lar, C. Lalchhuanthanga chuan single thar tihchhuah a tum hnai a, January thla chhunga a tichhuak hman lo a nih chuan February thla tir hi chuan a tichhuak hman tawh ngei ang.

Kyusho Waza music video thar tur hi 'Pawm mai ta che' tih a ni a, tlangval leh nula inkar chungchang a ni. Nula hian tlangval hi a duh leh duh loh a tilang lo a, tlangval hian a duh em em thung. Hetiang hi a hla thu kalhmang tur a ni a, a video pawh hetiang lam tur hi a ni. Mizotena music video-a kan la hmuh loh tur ang chi a nih dawn niin amah Kyusho Waza chuan a sawi.

He music video hi Kyusho Waza a mala a zaina tur a ni a, Kyusho Waza hi zaithiam dangte nena an zai kan hmu deuh ber a, tuna mi hi amah chauha a zaina video pahnihna tur a ni. Music video hrim hrim hi paruk lai a siam tawh.

"Ka music hmasate nen a inang chiah dawn lo a, tlemin a danglam hlek ang. Guitar solo thui vak lo a awm a, hei bakah hian a video-ah hian lâm thiamte an lâm bawk. A music pawh a kar laka inthlak zeuh zeuh a awm ang," a ti. Tunah hian editing leh ṭul dangte tih zawh vek tawh a ni.