Zack Snyder’s Justice League a dawn

DC Comics leh DC movie reng renga ṭawngkam lar tak chu 'dark' tih hi a ni. DC villain zinga hlauhawm ber chu Darkseid a ni a, chumai piah lamah DC chu an 'story' pawh 'dark' hle tura beisei a ni. Justice League movie mi tam takin an sawiselna ber chu 'an duh aiin a 'dark' lo'.

JL fan-te authawm hriain director Zack Snyder-a'n ke a rawn pen a, a film siam sa, Whedon-a'n tam tak a paih sak chu rawn thar thawh lehin nakkumah tha tharin a tlangzarh ṭha leh dawn a, DC fan-te tan beiseina kawl eng a rawn siam leh ta a ni. Chumi teaser trailer chu DC Fandome-ah tihchhuah a ni a, JL movie-a kan hmuh loh thil tam tak kan hmu dawn tih a lang reng tawh mai.

Darkseid (Ray Porter) hmel chiang zawkin a lang a, Steppenwolf landan pawh kan hmuhdan hmasa nen khan a inang chiah lo bawk tih a hriat theih. Snyder chuan part pali-ah ṭhen hran a ni dawn tih a sawi chiang nghal bawk a, minute 214-a thui a ni dawn tih a sawi bawk. Pathianin khawvel aṭangin hripui hi a labo a nih ngat chuan, nakkum chu film industry tan chuan kum ṭha a ni ngei dawn niin a lang.