Whatsapp hmangtu an pung zel

Khawvela messaging service lar ber chu a lar chhunzawm zel a, tunah chuan khawvel pumah he app hmangtu maktaduai 700 lai an awm tawh.

WhatsApp CEO, Jan Koum chuan tunah hian khawvel pumah Whatsapp hmangtu mi maktaduai 700 an awm tih a sawi a, nikum August thla kha chuan mi maktaduai 600 an ni. He app hmangtute hian nitin thutawi tluklehdingawn 30 an thawn ṭhin niin a sawi.

Hmangtu a ngah ta hle a, khawvela social network lian berte zinga mi a ni tawh. Twitter hian hmangtu maktaduai 284 a nei a, Instagram hian hmangtu maktaduai 300 lai a nei bawk. Facebook hmangtu erawh an tam fal hle a, tunah hian FB hi thla tin mi tluklehdingawn 1.3-in an hmang ziah a ni.

Facebook-in Whatsapp lei an tumna an la tifel lo a, an indawrna hi dollar tluklehdingawn 19 zet a ni a, Silicon Valley chanchina indawrna lian berte zinga mi a ni. FB lama stake holder leh investor-te chuan Whatsapp hian hmangtu tluklehdingawn nei tling phawt se, an ti deuh. Whatsapp pawhin hmangtu an pun zel theih nan an app hi thuam ṭhat zel an tum.