Phone man tlawm, changkang

A man a tlawm em em a, Rs. 2,999 chauhin e-commerce website-ah zawrh chhuah a ni a, chu­tih­rual chuan OS-ah An­droid thar ber a hmang thung.

Celkon-ina an siam, Campus A400 hi a man a tlawm ang huin a ṭha a, chuvang chuan e-commerce website-a an zawrh chhuah pawh hi tunah chuan an hralh zo tawh niin an sawi.

Celkon Campus A400 hi dual SIM a ni a, Android 4.4.2 KitKat a hmang a, a hmai hi inchi 4-a hlai a ni a, chu chu 480x480 pixel a ni a, WVGA IPS display a hmang. A processor pawh hi a chhe lo a, 1GHz dual-core Spreadtrum a ni a, a RAM pawh 256 MB lai a ni.

Inbuilt storage a len hian phone hman a nuam a, Celkon Campus A400 hi 512MB inbuilt storage nei a ni a, microSD card a hmang thei a, 32GB thlenga lian a support. Camera pahnih, a hma leh hnungah a nei a, a hma camera hi 0.3 MP a ni a, a hnung camera hi 2MP niin LED flash a awm bawk.

Connectivity lamah chuan a awm tur pangngai a awm kim ve biai. 3G a hman theih a, GPRS/EDGE, Wi-Fi 802.11, Micro-USB leh Bluetooth te an bilh ve vek. A battery pawh a ṭha pangngai. Nikum khan Windows OS hmang Celkon hian an lo tlangzarh tawh a, Windows hmang hi Rs. 4,979 man a ni.