Fashion Fiesta

Red Carpet fashion

Khawthlangho tihdan kan hria a, remchang eng eng emawah red carpet kan pharh ve a, a chungah milarte kan kaltir ve. A ṭha lo e, tihna ni loin, kan entawn dawn rau rau chuan a nihphung kan hriat a pawimawh hle. Red Carpet kaihpharh ngawr ngawr chu thu hran nise, Red Carpet-a an rawn hak chhuah thuamhnawte hian khawvel ngaihhlut a hlawh a, fashion khawvelah hnu hma lian tak a hnutchhiah zui ṭhin.

Red Carpet hrim hrim hi milarte kalna bik liau liau a ni hran lo a, tunhma aṭanga an lo hman tawh ṭhin danah mi pawimawh bikte kalna tur, thil tihpui nikhua bika mi ropui leh ngaihsan hlawhte kalna tura an lo phah hi a ni. Tunlai khawvelah chuan hei chauh hi a ni tawh lo a, award leh chawimawina eng emaw an semah, a chhung thu ni loa a pawn lam tihlansarhna pakhat a ni a, fashion khawvelah kaihluh a ni a, media lamin an ngaihven em em. Red carpet-a kalten eng thuamhnaw nge an hâk a, eng nge an inbel ṭhin tih hi media-te zawhna ber a ni a, chu chuan khawvel fashion industry a nghawng hle a ni.

Oscar leh Golden Globes awards-a red carpet-a kalte thuamhnaw inbel hi media hrang hrangin an lo thlir uluk em em a, fashion designer-te tan phei chuan he hunpui pahnih hi a pawimawh lehzual hle. Hei baka red carpet khawvelin a thlir nasat chu Vogue chanchinbuin Met Ball-a a buatsaih ṭhina mi hi a ni.

Kum 1990 hmalam kha chuan celeb-te hian red carpet-a an thuamhnaw inbel tur hi anmahniin an thlang tlangpui. Oscar-ah chuan incheina mak tak inbel chhuah hmuh tur a awm ṭhin a, chung zingah chuan, a hunlaia mite hriat lar lutuk loh, torn denim te, sequinned jumpsuit te, Indian headress (Red Indian lu cheina arhmul leh a behbawm) te an ching hle a, a hnuah khawvelah a lar zui phian. Golden Globes-ah pawh hian kum 1990 hmalam kha chuan formal dress hmuh tur a tam lo ṭhin khawp mai.

Kum 2000-a Halle Berry a rawn inlan a, Valentino var a rawn inbel chhuah kha Golden Globe red carpet style rawn thlak danglamtua ngaih a ni; hetihlaia Halle Berry stylist Phillip Bloch a ni. Hemi hnu hian red carpet-a kal turte chu stylist-teah an innghat chho ta viau a, an thuamhnaw leh inchei dan kalhmang hrim hrimah stylist-te an intihsiak a ni zawk mah a ni. Hemi hnu hian designer-te an rawn pawimawh chho ta zel a, tunah chuan tu designer kutchhuak nge tih kha an en pakhat a ni tel tawh.

Oscars-ah hi chuan red carpet-a kalte thuamhnaw inbel hi a to uchuak thei hlawm ang reng hle a, mahse Golden Globes leh event dangah erawh chuan thuamhnaw man to tak tak inbel tura pressure a tlem deuh hlek zawk. Huate couture gown kher lo pawh a remchang chho zel a, Oscars-ah pawh hian tlemin a ziaawm leh hret tawh. Red carpet gown zinga sawi hlawh ber pawl chu 42nd Grammy Awards ceremony, February 23, 2000 kuma Jennifer Lopez rawn inbel, ready-to-wear Versace gown kha a ni a, chhuah chhawn pawh a hlawh hle.

Red carpet-a mi­lar­tena thuam­hnaw an rawn inbel chhuah hian fashion khawvel a nghawng nasatzia leh designer-te tana hlutzia hi sawithiam a har viau. Carmen Marc Volvo chuan, 'Vogue emaw Harper's Bazaar vela phek nga zet daiha vawi khat tihchhuah aiin sum lêt a tam zawk a ni. Khata an thlalak kha chanchinbu hrang hrangah, khawvel hmun hrang hrangah vawi tam tak chhuah chhawn a ni ṭhin a, an chhuah zawng zawng kha advertisement pangngai emaw, a chhuah man pangngai anga chhut ni ta se chuan dollar sang tam tak hu daih a ni," a ti. Kum 2002 Oscars-ah khan Kate Winslet chuan designer Ben de Lisi gown a ha chhuak a, de Lisi chuan, "Heta ṭang hian publicity engzat nge ka dawn tih leh pawisa engzat nge ka hmuh tih hi chhut sên a ni lo ang. Ama chanchin an ziah apiangin kha thuamhnaw nena a thlalak kha an dah tel zel a ni," a ti.

Red Carpet fa­shion-in khawvel a nghawng dan tlem tarlang ila. MTV Video Music Awards-a Gwen Ste­fani-in wine-colored satin clutch a ken chhuah avang ringawtin, kha clutch ang an siam, $720 man chu kar thum chhungin hralh zawh vek a ni. InStyle magazine-a an contributing editor Charla Krupp chuan American mipui tam tak, fashion show-a kal hman lotena fashion khawvela an dah chhuahna ber chu red carpet fashion hi a ni, a ti. Harry Winston chuan tlereuh siamtu tam takin $mtd2 bengbeh an siam chu a man a to a, a anpui, hmanraw chhe zawkin an siam a, chanchinbuah te an chhuah a, mahse hralh an harsat fo tho. Amaherawhchu red carpet-ah milar, Jennifer Lopez te angin an rawn inbel chhuah chuan, a hmanraw chhe zawka an siam kha an hralh nghal chuah chuah zel niin a sawi bawk.

Los Angeles-a thuamhnaw siamtu company pakhat, A.B.S. chuan red carpet-a milartena an inbel chhuah lem an siam ṭhin a, an hralh thei hle. Anni hian Saks Fith Avenue leh Bloomingdale-ah te an zawrh chhuahtir leh ṭhin a, an hralh hnem thei hle a ni.

Mizoramah pawh red carpet kan kaih pharh kan kaih pharh ve leh ṭan ta. Red Carpet-ah tute nge kal a, eng thuamhnaw nge an inbel tih hi miin kan thlir ṭan tial tial ang. Chung chu hre rengin red carpet siamtute pawh hian tawngpaw siam ngawt loin fashion khawvel nen a inkaihhnawih tih hriaa kan kaih pharh ve thiam a, Mizo tualchhuak thuamhnaw leh Mizo designer-te phochhuahna remchang leh tihlarna remchanga hman thiam kan zir a ngai hle.