Pakistan-ah pawh PK a hit

PK film-in sakhaw sawichhiat a tum lo

Aamir Khan-a channa film, sawisel hlawh zet leh hit zet si, PK chu Pakistan-ah pawh a hlawhtling hle a, Pakistan-a movie chhuah mek zinga sum lalut hnem ber dawttu a ni.
Alien-in mihringte a rawn zirchianna chanchin PK hi sakhaw pawl hrang hrang, a bikin Hindu ten an sawisel nasa a, hetichung hian a chhuah tawhna chinah chuan a hlawhtling em em zel. Pakistan box office-ah kar tawp chhung khan sum lalut hnem ber dawttu a ni a, Pakistan box office-a sum lalut hnem ber chu Pakistani film, Waar a ni.
Pakistan-ah hian PK hian cheng vbch15 a lalut tling tawh a, nimin Pathianni nen phei kha chuan cheng vbch18 a lakluh tlin ngei rin a ni. Waar hian cheng vbch22 a lalut thung. PK film-ah hian Anushka Sharma, Sushant Ringh Rajput, Boman Irani, Saurabk Shukla leh Indian actor lar Sanjay Dutt te pawh an chang.
Hindu Legal Cell chuan he film avang hian FIR an thehlut. Prashant Patel, Hindu Legal Cell-a an Secretary chuan Rajkumar Hirani, Aamir Khan, producer Vidhu Vinod Chopra leh Sidharth Roy Kapur lakah FIR hi thehlutin, PK film-ah hian Hindu pathian Shiva chu ṭha lo tak anga ngaih theih turin tarlan a ni tih a sawi.
PK film hian hei chauh hi thubuai a hmachhawn a ni lo. He film poster an tihchhuah hmasak ber chu Aamir Khan-a saruaka a awm lai, cassette player (Tape)-a a saruakna a khuhlai thlalak a ni a, hei vang hian FIR thehluh a lo ni tawh bawk.
Sakhuana chungchangah hian Aamir Khan chuan he film siamtu leh buaipuitute zingah Hindu tam tak an awm tih a sawi a, hei bakah hian he film-ah hian sakhaw mal thlur bik an nei chuang lo niin a sawi bawk. India ram chu demrocracy ram a ni a, mitin hian an ngaihdan phochhuah theihna hun an neih thu a sawi a, he film-ah hian eng sakhua emaw mah sawichhiat an tum lo tih a sawi a ni.
PK director Rajkumar Hirani chuan, "He film-in tarlan a tum chu nau a pian chhuah phat hian eng sakhua bik mah a ni lo a, a sakhua leh a thlir dan chu a seilennain a siamsak a ni tih hi a ni," a ti. "He film-ah hian Aamir Khan chu alien a ni a, sakhua a hre lo a, a awmzia a man thiam lo...naupang chu a lo seilenin eng sakhua emaw, eng pawl inkaihhruaina emaw zui tura hrilh a ni a, chu chu a sawi mai a ni. Chu rin dan a zui chu dik berin a ngai a, midang erawh chu dik lo zawkah a ngai. Hindu-ah pawh a ni a, Muslim-ah pawh a ni tho...hei hi he film-in tarlan a tum chu a ni," a ti.