Super Bowl-ah Katy Perry

Kumina Super Bowl neih turah Katy Perry a zai dawn a, Katy Perry hi rocker Lenny Kravitz chuan a zawm dawn.

Kumin Super Bowl hi XLIX (49-na) a ni a, February 1 hian Arizona-a Glendale-ah neih tur a ni. Half Time show-ah Katy Perry a zai dawn a, a zai hi Lenny Kravitz hian a pui ang.

Hemi chungchang hi Katy hian NBC-in an kawmnaah a sawi chhuak a, eng hla nge an sak dawn tih erawh a la sawi chhuak lo thung. Nikum November thla khan Katy Perry hi Super Bowl-ah hian a zai dawn tih an lo puang chhuak tawh a ni.

Super Bowl hi US-a sporting event-a en hlawh ber a ni a, khawvel huapa hmuh theih turin TV-ah pek chhuah a ni ṭhin bawk. He huna zai hi zaithiamtena an chak a ni a, Super Bowl-a an zai avang hian an record hralh nasa takin a pun phah ṭhin. Nikum khan Bruno Mars leh Red Hot Chili Peppers te an zai a, Billboard 200-ah Bruno Mars hi a hmaa top 10 aṭanga tla mai thei tura ngaih a nih tawh laiin, a zai hnu aṭangin pakhatna a hauh a ni.