Mawi duh luatah thihsualin a awm

Tunlai khawvelah chuan nungchang thlak a har a, hmel siam rem erawh a awl ta zawk. Plastic surgery leh hnawhpuarna chi hrang hranga miin an hmel leh pianzia an siam mawinaah hian ti fuh lo ngial ngial a awm theih a, Brazilian, Andressa Urach pawh hi a ti fuh lo ber zinga mi a ni ang.

Nikum khan Miss Bum Bum contest-ah runner-up a lo ni hial tawh a, Twitter-ah ringawt pawh zuitu 228,000 zet a nei. Nula mawng nalh intite inlanna hmun a ni a, Andressa Urach hi mawng nalh berte zinga mi a ni. Mahse nalh lehzual a tumna lamah a taksain a tuar a, tunah hian damdawi inah dah luh a ni a, a thih mai a hlauhthawnawm hle.

Urach hian a hnung lam, a mawng vel tinalh tura plastic surgery a tih chuan a chhe zawngin a ei mek a, a taksa timur (tissue) te a ṭawih ṭan a,enkawl mek a ni. A mawng tinalh tura hydrogel leh PMMA te a thun hi lak chhuah a ngai niin damdawi thiamte chuan an sawi a, chumi tur chuan a ke tan a ngai dawn niin an hre bawk. Heng damdawite hian taksa a khawih chhiat chuan thil pawi tak a thleng thei a, taksa bung hrang, organ hnathawh a titawp thei a, heng avanga harsatna tawk zaa 25 aṭanga 50 chuan an thihpui niin an sawi.

Nalh a tum nasa hle a, tun thla nga chhung chauh pawh khan vawi nga, plastic surgery a ti a, a hnar a zai ṭhattir a, a khabe a siam nalhtir a, a hnute a tilian a, hei bak thil dang pawh a khawih danglamtir. A mawng tinalh lehzual tur hian hydrogel a thuntir a, hman deuh hlek aṭang khan a mawng a nuam lo tih a sawi a, doctor a inentir a ni. Doctor-te chuan hydrogel hi a taksain a hip kang tur a ni an tih laiin a taksa hian a hip kang thei si lo a, harsatna a tawk ta a ni. A mawng leh malpui vel aṭangin hydrogel ml 400 zet an hip chhuak tawh.

Brazil-a plastic surgery tih hi a fuh viau lo a ni ang, sawisel leh nghawng chhe tak tak a awm zui viau. Kum 2012 khan khawvel pumah hnute tihlentir vanga harsatna tawk nuai 3 an awm a, Brazil-ah ringawt hian 14,000 zet an awm.