Billboard 200: 'Tortured Poets Department' in record a siam

Billboard 200 album chart tharah Taylor Swift album hnuhnung ber, 'The Tortured Poets Department' chuan a zawnin kar 11-na atan No 1 dinhmun a hauh ta a, kum 1993 hnua hmeichhe artist zinga hetiang dinhmun thleng thei hmasa ber a ni.

Whitney Houston chuan December, 1992 - March, 1993 khan 'The Bodyguard' soundtrack album chu a zawnin kar 13 chhung chart No 1 dinhmun hi a lo hauhpui tawh a, hmeichhe artist zingah record siam mektu a ni a, mahse Swift hian a record siam hi a rawn hnaih ve zel.

'TTPD' hi tlangzarh kar aṭangin No 1-ah a lang nghal a, a kar 11-naah pawh equivalent album unit 114,000 la neiin, traditional album sales 35,000 a la nei pha. Morgan Wallen 'One Thing at Time' pawh No 2-ah rawn chho lehin, equivalent album unit 74,000 a nei. Wallen hian he album hi kar 19 chhung No 1 a lo nihpui tawh bawk a, country album zinga chart chung bera awm rei thei ber record a lo siampui tawh a ni. Megan Stallion album thar, 'Megan' chu No 3-ah rawn langin, kumina hmeichhe rapper album chhuak zinga tlangzarh karah che ṭha ber a ni. Chappell Roan "The Rise and Fall of a Midwest Princess" chu No 6 aṭangin No 5-ah a rawn chho bawk.