Dafodils Ṭhazual 10
Essy-in Ṭhazualah hma a hruai
December 29-a Dafodils Ṭhazual Lengzem chart tihchhuahah kha chuan Thangromawia'n hma a la hruai a, Essy hi pathumnaah a awm a, a hmaah DJ Lalvenhimi a awm bawk. DJ-i hi pakhatna a nih tawh mai a beiseiawm viau laiin Hnahthial nula hi pakhatnaah a rawn awm ta daih.
Mizo Idol top 20 zinga mi Essy-i video hmasa ber 'In chhuang mai lo la' tih hla hi hmana C. Luri lo sak tawh ṭhin kha a ni. Mizo Idol top 20-a lang pha Essy hian a music video hi a uluk a, a beih pawh an bei rei nangiang a, sum pawh an seng hnem. Model-ah Miss Mizoram Lalchhanhimi hman a ni a, a shoot nan pawh hian thla khat zet hun hman a ni. Nikum July thla chhung zawnga an shoot kha a ni a, SVP kutchhuak a ni a, an uluk a, a satu a thiam bawk a, pakhatna a rawn hauh ta pawh hi a âwm lo hauh lo.
'In chhuang mai lo la' hla hi nikum September thla khan MDM Library-ah a dah a, October 6 aṭang khan Dafodils Ṭhazual 10-ah hian a rawn lang ṭan. A vawi khat lanaah hian pasarihnaah a lang a, chart tih chhuah apiangin pakhatin hma a sawn chho zel a ni. December 16 khan pahnihnaah a lang a, December 29 khan pathumnaah a chhuk leh a, kum a thar meuh chuan pakhatnaah a rawn lang thei ta a ni. Kumin chhunga lengzem huanga pakhatna hauh hmasa ber a ni.
DJ Lalvehimi hla 'Khua tuah loh di' chu pahnihnaah bawk a awm leh a, Dec 29 khan pahnihnaah a awm a, December 16 kha chuan pasarihnaah daih a awm thung. Ani hian hla a la nei tam lo nain a hla a hit thei hle a, a hla tihchhuah tawhte hit kai lo a awm lo.
A hmaa pakhatna hauhtu Thangromawia chu pakhatna aṭangin pathumnaah a chhuk thla ta a, ani hian Dafodils Ṭhazual 10-ah hian pakhatna ṭum thum a hauh tawh a ni. Christy & Hriatrenga te chu palinaah tho an la awm. Pakuana aṭangin Kolkata Mizo Student-te music video 'Kan ding(Zoram tan)' tih chu panganaah a rawn chho bawk. Josephine-i chu 'A na chuang e' hla hmangin pakuanaah a rawn lang thar bawk.
Dafodils Ṭhazual 10
1 Essy - In chhuang mai lo la
2 DJ Lalvenhimi - Khua tuah loh di
3 Thangromawia - Phuloh lung di
4 Christy & Hriatrenga - Muanna nge hmangaihna
5 Kolkata Mizo Student - Kan ding ( Zoram tan)
6 H. Vanlalngura - Ka rawn zawng zel
7 Ropuii Pachuau - Matehawngi
8 Sangkimi - Duat
9 Josephine- A na chuang e
10 Biakmuana - Min hlan lai khan