Boyhood a langsar

Khawvela film lama inchawimawina ngaihhlut berte zinga mi chu anni tana Pathianni zan, keini tana Thawhṭanni tukah sem a ni a, movie award dawng langsarah, box office-a kan hriatlar lutuk loh Boyhood a langsar.

Actor leh actress-ah pawh hriatlar sa, Mizotena kan hriat em em aiin Eddie Redmayne leh Julianne Moore te an langsar bawk. Heng movie leh changtute hi an lar lo tihna ni loin, mi tam takin kan lo beisei, kan ngaihsan leh an channa tawh phawt chu hmuhnawm tura kan beisei leh rinte aiin Golden Globes-ah hian an lian zawk tlat.

Boyhood film hian Best Motion Picture - Drama a la a, hei bakah hian Best Director leh Supporting Actress te he film hian a la bawk. The Grand Budapest Hotel chu Best Motion Picture - Musical or Comedy-ah a lang bawk.

British actor Eddie Redmayne hian Best Actor in Motion Picture - Drama-ah a la a, ani hi Stephen Hawking-a chanchin, The Theory of Everything-a a changtu a ni. Julianne Moore hian Best Actress in a Motion Picture - Drama a dawng a, a dawnna film hi Still Alice a ni a, hetah hian linguist angin a chang.

Golden Globe Awards hi Beverly Hills, California-a Beverly Hilton Hotel-a sem a ni a, Tina Fey leh Amy Poehler ten an host a ni.

Awards sem hmaa red carpet-a kal zingah J.Lo, Dakota Johnson leh Jessica Chastain te thuamhnawin comment a hlawhzui deuh berin a hriat. Jennifer Lopez hian Zuhair Murad duan long dress a rawn inbel chhuak a, Dakota Johnson hian metallic floor-length Chanel a rawn inbel chhuak a, metallic clutch a rawn sin (keng) tel bawk. A hmai a chei vût lo a, a lang natural hle. Jessica thung hian metallic bronze figure-hugging floor-length Atelier Versace gown a ha a, a inhmeh phian. Intersteller changtunu hian tangkaruaa siam bengbeh, ngûn leh chutiang mil tur heel a rawn bun chhuak a ni.

Golden Globes-ah hian kal tura an mi sawmte tan award sem hma hian zanriah an buatsaihsak vek ṭhin a, an mi sawmte hian an ṭhutna an pan tlai emaw, an hmuh har emaw chuan chaw hi an ei hman meuh lo! Darkar chanve chhunga zanriah ei zawh vek tur a ni a, TV-a a rawn lan tawh chuan dawhkanah khuhhriang leh belthleng lam chi reng reng a lan an duh tawh lo. Naomi Watts leh a partner Liev Schreiber te chuan an ṭhutna an hmu hma a, puar el euhin an ei hman.Ethan Hawke a thleng tlai lutuk, zanriah pawh mumalin a ei hman lo.

Milar award semna tur hmun rawn thlengte red carpet-ah an kal nghal ṭhin a, Jack Black erawh chuan red carpet aiin fan-te nena selfie a duh zawk! A hnuah red carpet a pan ve chauh. Award latu tam tak zinga lawm dan tur ruahmanna siam mak ber chu Fargo avanga mini-series huang chhunga best supporting actor latu Billy Bob Thornton a ni. A lawm dan tur a sawi a, "Zu ka in meuh si lo a, vawksa pound sarih (kg 3 vel) zet ka ei ang," a ti; a duh ve hle a niang!

Winner list Ṭhenkhat

Best Motion Picture - Drama : Boyhood

Best Performance by an actress in motion picture - Drama : Julianne Moore

Best Performance by an actor in motion picture - Drama : Eddie Redmayne

Best Motion Picture : Comedy or Musical : The Grand Budapest Hotel

Best Animated Feature Film : How To Train Your Dragon 2

Best Performance by an actress in a supporting role in a motion picture : Patricia Arquette, Boyhood

Best Performance by an actor in a supporting role in a motion picture : JK Simmons

Best Director : Richard Linklater, Boyhood

Best Original Score : Johann Johannsoon

Best Television Series - Drama : The Affair

Best Performance by an actress in a Television Series - Drama : Ruth Wilson

Best Performance by an actor in a Television Series - Drama : Kevin Spacey

Best Television Series - Comedy or Musical : Transparent