UK-ah Sam Smith a ropui

Pakhatna a kalsan tawh dawn emaw tih hnuah Sam Smith chu UK album chart-ah pakhatna a rawn hauh leh.

Soul singer Sam Smith hian tun hi UK album chart-a pakhatna a hauh ṭum thumna a ni a, pakhatna a hauhna album hi a ngai bawk, In The Lonely Hour tho kha a ni. He album hmang hian nikum June khan pakhatna a lo hauh tawh a, September-ah khan pakhatna a hauh tawh bawk. Heti hian UK album chart-a pakhatna a hauh chhung hi hapta nga a ni ta.

Ed Sheeran-a album hit X chu pahnihnaah che loin a la awm a, kar hmasa pawh khan pahnihna a ni tawh. Kar hmasaa pakhatna George Ezra album, Wanted On Voyage chu pathumnaah a tawlh thla.

Single chart lamah erawh chuan thil danglam lutuk a awm lem lo. Mark Ronson leh Bruno Mars te an dinhmun pangngaiah an la awm a, an hla, Uptoen Funk chu pakhatna a la ni. Philip George-a hla, Wish You Were Mine chu pahnihnaah awmin, Ed Sheeran hla hit, Thinking Out Loud chu pathumna a ni.