Kum 2014 Pantei kum DJ-i a zawnin pakhatna a ni rei ber

14th January, 2015

Dafodils Ṭhazual Lengzem chart-ah, kum 2014 chhung khan Lalpanliani, Pantei chu pakhatna hauh ngun ber a ni a, ṭum nga pakhatna a hauh. A zawna pakhatna ni rei thei ber thung erawh DJ Lalvenhimi a ni.

Pantei hi a hla, Zai Rimawi nen pakhatna a hauh ngun ber a, ṭum nga pakhatna a hauh. He hla hi kum 2014 chhunga Dafodils Ṭhazual chart-a pakhatna hauh hmasa ber a ni a, January thla chhung pakhatnaah a awm a, J. Ruby leh Alex te pakhatnaa an rawn lan hnuah, March thla khan aṭang khan Pantei hi pakhatnaah a awm leh a, April thla thleng pakhatna ṭum thum a ni leh.

Mizotena kan lawm em em, DJ lalvenhimi leh Michael M Sailo te hla, Liam Mai Rawh, tih hla chu May 5 aṭang khan pakhatnaah a rawn lang a, a zawnin ṭum li ngawt pakhatna a hauh a ni. He hla hi nikum chhunga a zawna pakhatna hauh rei thei ber a ni. Pantei hian a zawna pakhatna a hauh rei ber ṭumah ṭum thum pakhatna a hauh a, midang pawhin ṭum thum an hauh bawk. Liam Mai Rawh tih hla hi September thla thleng khan Dafodils Ṭhazual Lengzemah hian a lang thei.

Pantei leh DJ-i te hian pakhatna an hauh ngun fal a, pakhatna ṭum thum hauh thei hi pathum an awm a, ṭum hnih hauh thei pali an awm bawk. Ṭhazual chart-ah hian pakhatna lang zaithiam, hming malin 12 an awm a, duet-a pakhatnaa lang an awm avangin pakhatna hauhtu zawng zawng hi sawm angin a sawi theih ang. Duet-a pakhatna hauh theite J. Ruby leh Alex - Huasua Daihti leh DJ Lalvenhimi leh Michael M Sailo aka 135 - Liam Mai Rawh te an ni.

Mipaah C. Sanga leh Thangromawia ten pakhatna ṭum thum ve ve an hauh thei a, Thangromawia hi kum 2014 chhunga pakhatna hauh hnuhnung ber a ni. C. Sanga hian LT A Mak Ka Ti hla hmangin July thla chhung khan pakhatna a hauh a, Thangromawia hi Phuloh Lung di hla hmangin December thlaah pakhatna a ni. A pumpuiah hmeichhia aiin mipa an lang tlem zawk a, mahse mipa langte hi an chhe lo tlang hlawm. Thiamchantira chuan 'Rinawmin' hla hmangin pakhatna ṭum hnih a ni a, Biakmuana pawh 'Min Hlan Lai Khan' hla hmangin pakhatna vawi hnih a ni bawk. Alex-a hi vawi khat angin kan chhiar thei bawk ang.

Hmeichhe lang dangte hi Christy Zaithanchhungi, Famkimi Kawlni leh Ropuii Pachuau te an ni a, J. Ruby, Alex-a nena Huasua Daihti satu hi a hranin kan chhiar bawk. Nikum chhung khan Ṭhazual Lengzem chart hi vawi 27 siam hman a ni.