UK tan 2014 a lum ber kum

UK-te hi chu khawvel hmar chan lamah pawh a hmawrtawng lam an ni deuh tawh a, hmun vâwt tak a ni. Mahse khawvel lum zel avangin an sik leh sa pawh a lum chho tial tial. Kum 2014 kha UK-ah chuan khawlum ber kum a ni.

UK-a khawlum zawng hi kum 1910 aṭang khan chhinchhiah ṭan a ni a, nikum khawlum zawng chawhrual kha 9.9C a ni a, chu chu khawlum ber record 2006 aiin 0.2 degree-in a sang zawk a ni. Met Office-in a tarlan danin kum hmasa lamte nena thla tina khaw lum dan tehkhawngah pawh nikum kha a lum zawk deuh vek a ni.

Nikum kha UK tana khaw hnawn ber kum a ni bawk a, kum dang zawng aiin ruahtui a tla hnem. UK-ah pawh England leh Wales tan khaw hnawn ber kum a ni a, heng ram pahnihah hian kum 1776 aṭang khan ruahtui tla zat hi an lo chhinchhiah tawh a ni.

World Meteorological Organization-in a chhinchhiah danin kum 2014 kha khawvel pumah pawh a lum ber kum a ni a, hei hian global warming a nemnghet a, a kum telin khawvel hi a lum zel a ni. Nikum October thla thleng khan, khawvel pumah, kum danga a lum ṭhin dan pangngai chawhrual aiin celsius 0.57 zetin khua a lum zawk. Thla mal mala lakin, kum dang zawng aia lum uchuak, record siam khawpa lum a awm lo nachungin, a pumpui thuah average temperature-a ngaih aiin a sang deuh vek.

WMO-in sik leh sa bakah ruahtui tlak dan hrang hrang a chhinchhiah ṭhenkhatte:

September thla khan Balkan ram velah chuan thla tina ruahsur zat pangngai let hnih zeta tam a sur a, Turkey-ah phei chuan a lêt lia tam a tla.

Morocco-a Guelmin khuaah chuan kum khat chhunga an khuain ruahtui an dawn zawng zawng ang zat ṭhin chu ni li chhungin a tla

Japan khawthlang lamah, ruahtui tla a chhinchhiah ṭan aṭangin, August thla chhunga ruah sur nasat ber ṭum a ni

United States khawthlang lamah chuan khawkheng an tuar

Nikum chhung khan thlipui, tropical storm 72 zet a thleng a, North Atlantic, North Pacific thlang lam leh Indian Ocean hmar lamah te a thleng nasa zual