Bieber-an movie lam a âwn

Music khawvelah a hlawhtling tawh a, mahse van hnuaiah hian tawpintai a awm thei lo a nih hi maw le! Justin Bieber pawhin movie lama luh a duh thu a sawi chhuak ve leh.

A bialnu ṭhin Selena Gomez chu acting lamah kan hmelhriat tawh a, Disney lamah a lar hmasa a, zaithiam dang ṭhahnem tak pawhin movie hi an luhchilh a, Rihanna channa, Battleship phei chu box office-ah pakhatna a hauh thei hial a ni. Hetiang hlawhtlinna hi Justin Bieber pawh hian neih ve leh a chak a, a sawi chhuak.

A mimal nunah tih tur hmachhawp leh tum tam tak a nei tih a sawi a, Hollywood luhchilh a châk a, chutihlai chuan music khawvel erawh chhuahsan a tum lo thung. Movie mai hi a sawi lo a, fashion lam pawh a sawi bawk. Bieber hian engtikah emaw chuan movie chan a, fashion line siam a tum a ni.

Bieber hian social media a fak hle a, social media chu a fan-te nena thlung zawmtu ṭangkai tak a ni tih a sawi. A tan social media thil pawimawh berte zinga mi niin a sawi a, YouTube aṭangin a lar chhuak a, tunah chuan social media hrang hrangah a langsar ber pawl a ni tih. Twitter-ah ringawt pawh follower maktaduai 60 vel zet a nei tawh a ni.