Music ngaina tak taktena an pan Ṭhin Concerto Musical Show

Nikum lamah buatsaih a lo ni tawh a, a hlawhtling a, music ngaina tak takte an fuankhawm ṭhin. Concerto Musical Show hi kuminah pawh chhunzawm zel a ni dawn a, January 23 khian Chanmari YMA Hall-ah neih leh a ni ang a, hetah hian tunlaia Mizo musician ṭha ber berte an che leh dawn. Entry fee erawh a awm leh dawn.

Concerto musical show an buatsaih leh tur hi a vawi thumna tur a ni a, hetah hian The Prophets leh Atari Minor-a an guitarist Eric Renthlei, Saxophonist Ela Fanai leh Magdalene leh Atari Minor-a an drummer, Grandton School of Music-a drums zirtirtu Patea te an inlan dawn.

Eric Renthlei hi Praise14-a guitarist pakhat zawk kha a ni a, nikuma Gospel band intihsiak ṭumah khan The Prophets chu pakhatna a nihpui a, guitarist ṭha bera thlan a ni. Amah influence-tu chu Dimebag Darrel, Neal Schon, John Petrucci, Slash, David Gilmour, Jimi Hendrix leh Jorn Viggo Lofstad te an ni. Concerto 3-ah hian RnB, Soul, Funk, Rock, Ballad leh Progressive Metal te a play dawn.

Saxophone lama Mizotena kan neih ṭhat Ela Fanai hi Jazz band kan neih ṭhat em em Lemon House-a mi ṭhin kha a ni a, kum 2007 aṭang daih tawh khan saxophone hi a lo play tawh a, brass band-ah te pawh a lo tel tawh ṭhin a ni. Dreamhunter music video thar ber 'Dawn tisei turan' tihah khan saxophone a play bawk. Eroc Marienthal leh Benny Carter te hi amah influence-tu an ni. Concerto-ah hian music style hrang hrang a play ang.

Magdalene leh Atari Minor-a an drummer ni mek Patea hian Zorimawi khawvelah hnuhma leh chanchin tam tak a nei tawh. Cold Embrace kha Lawma leh Jona Hnamte te nena an din a ni a, tunah chuan a tel tawh lo. Atari Minor-ah hian tunah rih chuan a inkhung hle a, kumin hian he band hian album tihchhuah an tum a, an bei ngawrh hle. Patea hian Concerto-ah hian Mizorama kan music-a neih ṭhatte a rawn perform pui dawn. Vocals-ah Zahminga, bass-ah Jonah Hnamte, Guitar-ah Bishal Gurung leh keyboardist-ah Mawia te a hmang ang.