Young V&A in 2024 Museum of the Year award dawng

London, UK-a naupang pual deuh bika duan, khawvela museum hlimawm ber tia inchhal ṭhin, Young V&A chu 2024 Museum of the Year award dawng tura thlan a ni.

Young V&A hi Victoria and Albert Museum branch niin, kum 1872-a Bethnal Green Museum tia din ṭan a ni. V&A Museum of Childhood tih a nih leh a, a hnuah Young V&A tih hi a pu zui a ni. East London-a Bethnal Green hmunah a awm. Kum 2005 khan £ mtd 4.7 senga chei ṭhat niin, kum khat chhung an khar a ni. 2019-ah thuamṭhat leh a ni a, £ mtd 13 vel zet an seng. Hun rei tak an khar hnuah July, 2023 aṭang khan tlawh theihin an hawng leh, hawn a nih aṭang hian tlawhtu 590,000 chuang an awm tawh.

Museum-ah hian gallery thar pathum - Play, Imagine leh Design te dah belhin, hengah hian BC 2300 hunlai aṭanga tun hun thlenga naupang lawm leh an infiamna hmanrua an lak khawm, object 2,000 chuang a awm. Design studio, tleirawlten game an design theihna tur hmun leh, Minecraft installation an tih theihna hmunte a awm. He museum in a tum ber chu mi tin, a bikin kum naupang zawkten naupangte puala thil siam leh, anmahni ngeiin an siam hmanga hlim taka hun an hman chu a ni tih an sawi.

2024 Museum of th Year award dawng thei tur hian finalist panga thlan chhuah zingah hian Skipton, North Yorkshire-a Craven Museum, Dundee Contemporary Arts, Manchester Museum leh London-a The National Portrait Gallery te an lang ve bawk. Award dawngtu hian lawmman £120,000 a dawng dawn a, finalist-te hian £15,000 ṭheuh an dawng bawk ang.