Essy'n hla dang a puah mek Hip-hop lam rawngkai beisei thung ang

Dafodils Ṭhazual 10-a pakhatna hauh mek, Essy chuan tunah chuan hla thar dang a buaipui ṭan leh mek a, hei hi erawh chu tuna a hla hit mek nen a kalphung a inang lo viau thung ang.

Essy chuan, "Tuna mi hi chu a kalhmang a danglam dawn hle a, a hmaa mi nen a inang lo hle ang. Hip-hop lam rawngkai a ni a, kar lehah khian recording kan buaipui ang a, tun thla chhung hian tihchhuah hman ka inbeisei," a ti. "A hla kalhmang pawh lengzem tho a ni a, hla thuah hian hmeichhiain star a nei a, a star erawh chuan a ngaihsak si lo...tih vel a ni," a ti.

A hla buaipui mek hi a title a la awm lo a, mahse beisei a sang. A phuahtu hi Tetei Ralte leh Reuben-a te hla hit em em 'Si Maw' phuahtu OPI Sailo kha a ni a, hei vang hian 'Si Maw' ang type kha beisei ila, kan tisual lo mai thei a, kan tisual a nih pawhin a ṭhelh nasat a rinawm loh. Essy chuan, "Tunlai ṭhalaite duh chi a ni ang," tih zawng a la sawi phal a, thui a sawi tam duh rih lo.

Essy hian tun hi hun eng emaw chen atana a hla buaipui hnuhnung ber rih tur a ni. Class ṭan a hun tawh a, class ṭan a nih hunah chuan engmah a buaipui hman tawh rih lo ang. Mahse exam an zawh hunah erawh hmachhawp dang eng emaw zat a nei a, hla siam tur, hla ṭha tak tak a nei nual sa a ni.

Dafodils Ṭhazual Lengzem 10-ah 'Inchhuang mai lo la' tih hla hmangin pakhatna a hauh mek a, Essy chuan, "Hetiang thleng thleng a thleng pha ang tih ka beisei lo reng reng," a ti. "Chart-ah pawh hian a lan ka beisei tawh lo a, a lan ka beisei loh hnuah rawn langin hetiang chen chen a thlen hi ka ring lo hrim hrim," a ti a, "Ka lawm a, miten min hlutsak avangin ka lawm tak tak a ni," a ti bawk.