Taylor Swift album mtd3.94 an hralh tawh

A zai dan ngaina lo tan chuan a zaithiam tih rual ni lo mah se, music khawvelah chuan a hlawhtling thlawt a ni. A album thar ber 1989 chu copy maktadua 3.94 zet hralh a ni tawh. Tunkar chhunga album hralh hnem ber a ni leh bawk.

Taylor Swift album hmasate pawh kha copy maktaduai 4 hralh tlin an ni deuh fur. Kum 2006-a a tihchhuah, ama hmingchawia siam, Taylor Swift aṭanga kum 2012-a a tihchhuah Red album thleng khan copy maktaduai 4 a hralh tling vek a, tuna a album thar pawh hi copy maktaduai 4 a la hralh tling ngei dawn e.

1989 album hi a hlawhtling hle a, NielsenSound Scan-in kum 1991 aṭanga mumal taka an record chinah, kar khat chhunga album hralh hnem ber pasarihna a ni a, kum 2014 chhunga album tihchhuah zinga hralh chhuah hnem ber a ni bawk. Kum 2014-a album chhuak zinga hralh hnem ber dawttu chu Cold Play album, Ghost Stories kha a ni a, Frozen OST hi an hralh hnem viau a, mahse kum 2013-a tihchhuah kha a ni. 1989 album hi tunkar chhung khan copy 155,000 zet hralh belh leh a ni.

Ed Sheeran album X chu pahnihnaah a awm a, he album hi tunkar chhung khan copy 76,000 hralh a ni. Nicki Minaj album thar The Pinkprint chu pathumnaah a awm a, copy 60,000 hralh a ni. Sam Smith album In The Lonely Hour pawh palinaah a rawn lang a, copy 57,000 an hralh.

Billboard 200

"1989" - Taylor Swift (155,000)

"X" - Ed Sheeran (76,000)

"The Pinkprint" - Nicki Minaj (60,000)

"In the Lonely Hour" - Sam Smith (57,000)

"SremmLife" - Rae Sremmurd (49,000)

"Hozier" - Hozier (49,000)

"2014 Forest Hills Drive" - J. Cole (45,000)

"Guardians of the Galaxy" Soundtrack - Various Artists (35,000)

"FOUR" - One Direction (32,000)

"My Everything" - Ariana Grande (28,000)