Academy Awards nominee an puang

Movie lama award, khawvelin a ngaihsan ber tia sawi ngam, Academy Awards, Oscar tia an sawi bawk, nomination list puan chhuah a ni ta. Birdman leh Golden Globes-a langsar, The Grand Budapest Hotel te a langsar an ni.

Birdman film leh The Grand Hotel Budapest te hian nomination pakua ve ve an hmu a, The Imitation Game chu category pariatah a lang bawk. American Sniper chuan nod paruk zet a hmu. Nomination list hi Ningani tlai khan Beverly Hills, California-ah puan chhuah a ni.

Birdman leh The Grand Hotel Budapest te hi Best Picture-ah an lang ve ve a, he category-ah hian Golden Globes-a langsar ber, Boyhood a lang bawk. The Imitation Game a awm a, Stephen Hawking-a chanchin, Golden Globes-a langsar pawl kha a awm bawk. Hengte bakah hian American Sniper, Selma leh Whiplash te an la awm cheu.

Best Director category-ah hian Best Picture-a langho director-te an lang tlangpui. The Grand Budapest director Wes Anderson, Birdman director Alejandro Gonzalez, Boyhood director Richard Linklater, The Imitation Game director Morten Tyldum leh Foxcatcher director Bennett Miller te an lang.

Actor leh Actress ṭha ber chhawp­chhuah zingah hian kan hriatlar em em sa an tam lo a, a bikin mipa lamah an tlem deuh. Mipa-a Best Actor huanga langte chu Steve Carell, Bradley Cooper, Benedict Cumberbatch, Michael Keaton leh Eddie Redmayne te an ni. Hmeichhiaah chuan Marion Cotillard, Felicity Jones, Julianne Moore, Rosamund Pike leh Reese Witherspoon te an ni.

Blockbuster movie kan tih ho lang an tam lo a, a langho hi a tlangpuiin Best Visual Effects lamah an lang. Best Visual Effects-ah hian "Captain America: The Winter Soldier", "Dawn of the Planet of the Apes", "Guardians of the Galaxy", "Interstellar" leh "X-Men: Days of Future Past" te an awm. Maleficient chu Best Costume Design-ah a lang a, The Hobbit: The Battle of the Five Armies chu Best Sound Mixing-ah a lang bawk.

Best Animated Feature Film lamah erawh animation movie hlawhtling tak takte an lang. "Big Hero 6", "The Boxtrolls", "How to Train Your Dragon 2", "Song of the Sea", leh "The Tale of Princess Kaguya" te an ni a, Big Hero 6, How To Train Your Dragon te hi chu kan hre viau a, box office-ah pawh pakhatna an hauh a ni. Oscar hi February 22 hian sem a ni ang.