Fashion Fiesta

Khuain lum lam a pan em em lo bawk a, a vawt lam han thai lan a inthlahrun awm em em lo turah ngai ang. A vawt tual tual emaw tih turin kan incheina pawh a chhah tual tual a, nalh khelh pawh a har ṭalh tawh. A bikin kan hnam, a nawlpui mai hi lian sang thlerh thlawrh kan lo ni lo bawk nen, te/tawi lam tan phei chuan lan hnawk a awl zual. Inthlak inthlak te hi tun ang boruakah hi chuan a chakawm lem lo bawk nen, chhun lama chhuahvaha hak, zanlama hak chhunzawm mai theih tur te zawn thiam a pawimawh. Tun ṭum chu mi tilum tur ni pahfawmin tun thlasik reilote chhunga kan wardrobe/thawmhnaw bawma kawl ngei ngei tur tlem azawng thai lang lawk teh ang.

Jacket/Coat kan hre vek, a ṭangkaina leh mi nawlpui tan inhmeh theih anih avangin tun thlasik a ni emaw nakum thlasik lo thleng tur a ni emaw a hlui tak tak dawn lo. A design leh puan lamah hma kan sawn hlek anga tih mai loh chu a hmei apa, naupang aṭanga tar thlenga kan incheina tlanglawn ber a ni kumkhua tawh ang.

Classic Trench Coat - Trench Coat a tam zawkina kan hmel hriat dan tur chu designer brand lar Burberry hian design tunlai ber berin, a trench coat nihna bo si lovin kum tinin nalh tak tak min hlui fo mai. Runway leh fashion week lamah pawh trench coat a hlui thei lo. A hmei apa tana inhmeh theih ve ve, chhun i chhuahvahna a ni emaw zan lam biak in inkhawm aṭanga dinner ei chhuahnate thlengin he coat hi a ṭangkai vek. A duh tan a chhungah dress/pencil dress, kekawr tlawn boot cut emaw, pawnfen nen a mawi vek. A fual zawng erawh tawi lam tan mawng khuh chang chang ni thei se ,ria lam tan tlema arh deuh hlek leh, bawp tawi lam tan fual lutuk lo ni thei se, a kilh pumin emaw a inhawnga dara bah pawhin a mawi vek. Kan tlangval lam tan pawh i sweat shirt ngainat chungah emaw cardigan emaw pull over chungah ha tawp la, i kilh pum chuan i smart hle ang a, i hawn erawh chuan i tunlai riau thei bawk. A rawng erawh trench tih leh khaki rawng a inmil nghal, a uk leh hring duk lamin rem a ngah deuh ber.

Peacoat - Peacoat han tih chuan Mizoina a hma invuak thuah kan tih ang ho, a bikin jacket puan chhah deuh takho sawina ani tlangpui. Trench Coat nen a inang ṭep a, mahse a puan hi a chhah deuhin, en mai pawh hian a lum hmel bik ngawih ngawih a ni. Thlasik inthuamna duhawm tak a ni, a bikin mipa lamah a dum leh navy blue lamte a mawi bik. Hmeichhe lam tan erawh coat chhing ngawr ngawr loin tleirawl deuh tan peacoat dress te pawh a awm a, a nalh dangdai hle, a smart-in biak ina incheina atan pawh duhthusam a ni. Naupang coat fual atan pawh rawng no lampang hmangin a mawi em em a ni.

Fuzzy Coat - Mimal tak pawha ka ngainat em em, vur ram chauha hak tur emaw kan tih ṭhin, hmul deuh ther thur, lum ṭha si leh tunlai em em, ramsa hmul ni awma mawite hi waist coat leh tawi tii tei pawnfen inbel ila a nalhin a ṭangkai, a bikin zan lam boruak atan. Secondhand lamah pawh hmuh tur a awm nual, heng mink jacket kan tih ang chiho hi.

Bright Color Coat - Neih ve hrim hrim a ṭha, i ngainat zawng a ni lo emaw i ha ngam lo anih pawhin mamawh thut atan, a eng vût, sen lar tak te leh hring vat vat ang chi ho hi kawr rawng dal da dei nena inbela han hak zeuh hian mi a ti lang chei a, a mawi phian. Lansarh i hlauh deuh leh i kekawr emaw, a hnuaia i inbel kha a simple leh nude thei ang ber i inbel dawn nia. Hmeichhe tan chauh ni lo mipa lam tan phei chuan biak in thleng pawha hak a mawi a, a dangdai em em bawk.

Sharp Fitted Blazer - A tu a te pawh hian kawr hman thiam kan nei ang bawk hian coat hmanthiam, kan taksa fit thlap design mawlmang tak, khawi hmuna kal dawn pawha hak chhuah tawrh theih hi kawl/neih a ṭha. Hei hi chu simple deuh nise i kalna tur azirin brooch (pin mawi) emaw, a chhunga i hak, inchei deuh hlek emaw tein inbelpui la, a inhmeh vel vek.

Leather - Thlasik incheina sawia hmaih theih miah loh leather hi sawi zau vak ngaiah pawh ka ruat lo. A design ni buai lo se, kum tina a thar lei ngai loin rei tak, thlasik apianga i rin theih tur design simple deuh lam hi a hlui thei lo. Mi a ti incheiin hmeh loh a nei lem lo bawk a, a ṭha phian. Naupang thlengin an mawipui, a design chu thuhran, a leather nihna hrim hrim hian a hatu a chawi ve hranpa reng reng a ni.

Heng ka sawi jacket/coat te hi tun thlasik chhung hian lo kawl la, a vawh chhung na na na chu incheinaah i buai miah lo ang, thlasik hun chhung a rei tawh lo bawk a.