Christy-in hla hlui a kaitho

Tuna Ṭhazual chart-a Top 5-a lang phak, Christy Zaithanchhungi chuan hla thar dang a nei leh tawh a, video pawh a peih fel tawh a, ngaihthlak a chakawm tawh khawp mai. Hla hlui a ni a, tunhmaa lar ṭhin a, Christy-i hian engtiangin nge a kaihthawh ang le?

Christy-i hla thar hi Chhingkhual D tih a ni a, tunhmaa Mizo band lar leh hlawhtling ṭhin, 80s vela lar em em, Vulmawi hla ṭhin kha a ni a, Butta phuah a ni. Christy-i hian he hla hi eng chen nge a thlenpui ang tih a thlir lawk nghal loh theih loh a, Vulmawi hlaho zingah rau rau pawh a hlawhtling pawl, sak hlawh leh hriat hlawh ber pawl kha a ni.

Amah Christy-i hi a zaithiam a, a zaithiam avangin Dafodils Ṭhazual chart-ah pawh a langsar pawl a ni. Hriatrenga nena an sak dun, Muanna nge Hmangaihna tih chu Ṭhazual hnuhnung berah khan palinaah a lang pha a, April 21, 2014 khan Dafodils Ṭhazual 10 - Lengzemah 'A Dam Ve Tur' tih hla hmangin pakhatna a lo hauh tawh bawk. Mizo Idol hnuhnung bera Top 20-a lang phak Christy-i hian tuna a hla thar hi a hlawhtlinpui leh ngei a beiseiawm viau.

Chhingkhual D hla hi Foster Recording-a record a ni a, Mizo guitarist thiam leh chuai thei lo Thangbawiha'n music a buaipui thung a, a music zawnga ngaihtuah pawhin a chhe thei lo turah ngai ila a sual lo ang.