zonet Ṭhazual 10 Fakna

Pensy-i chhan tlak a la ni zel

Pensy-i chu a zawnin kum 2015-ah Zonet-in a tihchhuah ṭhin Ṭhazual 10 - Faknaah pakhatna a hauh a, pakhatna a zawna hauh thei hmasa ber a ni. Pensy-i hian a hla, a hmasaa pakhatna a lo nihpui tawh, Chhan Tlak Ka Ni Em Ni hmang bawkin pakhatna hi a hauh leh a ni.
Chhan Tlak Ka Ni Em Ni hla hi Parema hla phuah dahkhawmna, 'Ka Rinchhan Lalpa' album-a mi a ni a, he album-a hlate hian Ṭhazual 10-ah hian pakhatna a rawn hauh fo a ni.
A hla ṭhatzia thu chu thu hran ni ta se, Pensy-i hi a zaithiam a, hla a nei ṭha thei bawk. Nikum chhung khan Ṭhazual 10-ah pakhatna ṭum li zet a lo hauh tawh a, kuminah ṭum hnih pakhatna a hauh leh ta bawk a, nikum nena chhutin ṭum ruk zet pakhatna a hauh tawh a ni.
Tuna pakhatna a nihpuina hla hi Parema'n Pathian hnen aṭanga a hla dawnte zinga mi a ni. A lei (tongue) a cancer a, phaiah vawi tam tak an kal a, mi tam tak an bei a dawn a, rilru hah taka an awm ṭhinna, a harsatna tawhna angah Parema hian Pathian pawlna nasa tak a chang a, nun tam a neih belh a, Pathian hnen aṭanga a hla dawnte zinga mi a ni.
Chhan Tlak Ka Ni Em Ni awmna album, Ka Rinchhan Lalpa hralhna aṭanga hlawkna hmuh zawng zawngte hi cancer ṭanpuina atan hman a nih tur thu Parema hian a hmain an sawi a, a sawi ang hian nikum Krismas dawn khan he album hralhna aṭanga sum hmuhte cancer vei, ṭanpui ngai mi 13 te hnenah Rs. 10,000 ṭheuh pein ṭanpuina a lo sem tawh a ni.
Pahnihna luahtu ngai, TBCa pawh pahnihnaah a la ṭhu thei a, a hla 'Fak Zel Che Ka Duh' tih hi hla ṭha a ni. Pakhatna hauh thei tur khawp a ni a, amah TBCa a zaithiam a, a video pawh a ṭha e. He hla hi November 10 aṭang khan Ṭhazualah hian a rawn lang ṭan a ni.
Temi Sailo pawhin hma a sawn zel a, a hla Kraws Thu chu pathumnaah a rawn chuangkai a, a hmain pangana a ni. Lalhlumawii hla, 'Lei Leh Van Siamtu' chu palinaah a chhuk thla a, Hmingtea leh Sailo Nutei te hla 'Kir leh Rawh' chu panganaah a awm ta bawk. Maggie hla, Min Siam Thar Leh Rawh a chhuak a, a hla thar dang, Hmangaihna Par Tlanin tih a rawn lang thar a, Vanlalsailova pawh Ka Hawisan Phal Tawh Lawng hla hmangin top 10-ah a hming a rawn lang.
Ṭhazual 10
1 Pensy - Chhan tlak ka ni em ni
2 TBCA - Fak zel che ka duh
3 Temi Sailo - Kraws Thu
4 Lalhlumawii - Lei leh van siamtu
5 Hmingtea & Sailo Nutei - Kir leh rawh
6 Maggie - Hmangaihna par tlanin
7 Lancy - Min hruai zel ṭhin
8 Angela Lalremtluangi - Min hrilh fo rawh aw
9 Bethsy & TBC Zaithanpuia - Isua ka ṭhian a ni
10 Vanlalsailova - Ka hawisan phal tawh lawng