Miss Israel nena thlalak dun avangin an sawisel

Middle East-a in­ngeih­lohna leh inhuatna hi kan hria ang a, Judate leh Arab-ho hi an inngeih thei tak tak lo a nih hmel. Miss World thlan tur atana inpuahchahnaah Miss Lebanon chu Miss Israel nena thla an lak dun avangin Miss Lebanon hi an sawisel nasa hle.

Miss Lebanon, Saly Greige hi Miss Israel Doron Matalon nena ding dûnin, Miss Slovenia, Urska Bracko leh Miss Japan Keiko Tsuji te an lang a, group selfie an nei a, hei hi post nghal a ni. He thlalak hmuh a nih veleh Lebanon hmun hrang hrangah sawiselna a awm nghal ṭuam ṭuam a, na tak takin an comment a ni.

Thla an lak lai hian Miami-ah Miss Universe atan an inbuatsaih a ni.

Hetianga an sawisel tak chiam avang hian Saly chuan insawifiahna a tichhuak thuai. "Lebanon mipui leh mi ṭantute zawng zawng, Miss Universe Contest lo awm tur atana Miss Lebanon min ṭan leh puihna zawng zawngah ka lawm em em...He thlalak phena thudik chu, Miss Universe-a tel tura he hmun ka thlen thlak tirh aṭangin Miss Israel nena inbiak loh leh thlalak dun loh ka tum ngar ngar a, ani erawh chuan thla min lakpui a duh a, vawi tam tak min sawm a ni," a ti. "Miss Japan leh Miss Slovenia te nena thla lak kan tum laiin Miss Israel hi kan zingah a rawn tel ve top a, a selfie-a tichuan internet-ah a dah zui nghal a ni. Hetiang hi thil thlen dan a ni a, chuvang chuan Miss Unverse contest-ah pawh hian min la ṭan chhunzawm zel ka beisei em em a ni," a ti.

Israel Miss nena an thlalak dun hmuh tur a awm hnu lawk hian Leba­nese tam tak chuan Saly hi Miss Lebanon a nih­na hlihsak turin thu an thlen hman a ni. He­tiang thil hi a thleng tawh. Kum 1993 khan Miss Lebanon, Ghada al-Turk chu Miss Israel nena an thlalak dun Age­nce France Press-in a tih­chhuah avangin a nih­na an lo hlihsak tawh a ni.