American Sniper-in a kap chhuak hnem

US lamah chuan sniper-in lawm a hlawh. Clint Eastwood-a direct, American Sniper chu kar tawp chhunga sum lalut hnem ber a ni a, record siam pawh a nei.

American Sniper hian kar tawp chhung khan $mtd90.2 zet a kap chhuak a, January thlaa movie tihchhuah tawh zingah sum lalut hnem ber a ni. A hmaa sum lalut hnem ber chu kum 2010-a James Cameron-a tihchhuah Avatar kha a ni a, kha film khan opening weekend-ah $mtd68 a lalut.

He film hi Clint Eastwood-a tan chuan chhinchhiahtlak movie a ni dawn. Academy Awards-ah category parukah ngawt a lang a, chung zingah chuan Best Picture leh Best Actor te a tel. He film-a a changtupa hi Bradley Cooper a ni. Zirtawpni aṭanga tihchhuah ṭan kha a ni a, Zirtawpni bik hian $mtd30 a lalut. December thla khan theatre thlan bik tlem teah chhuah a lo ni tawh a, tun hi a nawlpuia US-a an chhuah hmasak ber a ni.

Box office-ah hian The Wedding Ringer chu pahnihnaah a awm a, he film hi Kevin Hart, Joe Gad leh Kaley Cuoco te channa a ni. Kar tawp chhung khan $mtd21 a lalut. Pathumnaah Paddington a awm. Heng film pahnih hi film thar ve ve an ni.

Kar hmasa leha pakhatna, Liam Neeson-a channa Tak3n chu palinaah a tla thla daih a, he film hian $mtd14 lai chu a lakluh belh. Selma chu panganaah a tla bawk.

Box office movie:

"American Sniper" - $mtd90.2

"The Wedding Ringer" - $mtd21

"Paddington" - $mtd19.3

"Tak3n" - $mtd14.1

"Selma" - $mtd8.3

"The Imitation Game" - $mtd7.2

"Into the Woods" - $mtd6.5

"The Hobbit: The Battle of the Five Armies" - $mtd4.9

"Unbroken" - $mtd4.3

"Blackhat" - $mtd4