Michael Moore-an Sniper a ngaisang lo

US box office-ah American Sniper a hlawhtling em em a, January thlaa movie tihchhuah tawh zinga hlawhtling bera sawi a nih mek laiin, film siamtu lar tak Michael Moore chuan sniper a ngaisang lo mai ni loin, dawihzep angah a chhuah.

American Sniper film hi US Navy SEAL-a mi Chris Kyle chanchin behchhana Clint Eastwood-a siam a ni. Michael Moore hian twitter-ah sniper a ngaihdan a rawn tarlan hian Chris Kyle hi dawihzep angin a lantir a, an sawisel nasa viau a, mahse a thlir dan dik titu an ṭhahnem hle tho.

Michael Moore chuan, "Ka pami hi Indopui II-ah khan sniper-in a kaphlum. Kan naupanlai aṭanga zirtirna kan dawn chu sniper-te hi mi dawihzep an ni. Hnung lamah pawh an kap mai ang che. Sniper-te hi hero an ni lo," a ti chhuak phawng. Hei bakah US-in Iraq a rûn chu a duh lo tih sawi chhuakin, "Rûntute hi an chhe fe" a ti bawk.

Mi ṭhenkhat chuan, "Moore hian American Sniper hi en se chuan, sniper tel loa American sipaite thih nasat dan turzia a lang a ni," an ti. An sawiselna tam tak chhangin Moore chuan, "Hmm. American Sniper emaw, Chris Kyle emaw chungchang pakhat mah ka sawi chhuak lo. Ka pami Indopui II laiin sniper-in a that a, hetiang hi chu mi dawihzep chauh lo chuan a chungah an ti lo ang, tih te mai a ni ka tarlan ni," a ti.