Shakira leh Pique Fa an neih tur pualin UNICEF tan

Fapa duhawm tak Milan an neih hnuah zaithiam Shakira leh Gerard Pique te chuan an fa pahnihna an beisei leh mek a, a hnai ve viau tawh. An fa pahnihna tur pual hian UNICEF tan an thawk nghal a, UNICEF-in naupang ṭanpuina tur sum a tuakah hma an lakpui.

UNICEF hian khawvel pumah naupang ṭanpuina turin World Baby Shower campaign an ṭan a, heta an campaigner ber chu Shakira leh Pique te hi an ni. Khawvel hmun hrang hrangah Shakira te nupa hian nau neihna hmanrua, naupang hri laka vênna leh an inawmlemna tur hmanruate lei turin mi an ngen a ni. Nau neihna hmanrua leh damdawi lam hmanrua, nau neihna atana ṭangkai tur te, sentût leh zeng danna hri te, pawnpui (blanket) te, naupang bûkna, ball, thawnthu bu leh naupang zirna atana ṭangkai tur thil hrang hrangte an zuar a ni.

Shakira chuan, "Ka fa pahnihna tur pawh kan neih hun a hnai ve tawh hle a, khawvel hmun hrang hranga naupangte ṭanpui kan duh a, rethei bakberha awm naupangtena an damkhawchhuah theih nana an mamawhte phuhruksak kan duh a ni," a ti. "Chutiang rilru chu keini nupa chauh hian pu loin, nu leh pa dangte pawhin naupang rethei leh hmun harsaa awmte ṭanpui duhna rilru an neih kan duhpui em em bawk. Social media a chak a, kan hman nasat tawhnaah hian keini nupa emaw, milarte ringawt hi kan tawk zo tawh lo a, kan zavaiin tih tur kan nei a ni," a ti.

Shakira hian an chhungkaw thlalak a dah chhuak a, chumi rual chuan video message a dah chhuak bawk. Message-ah hian nu, a naupai hring hnai tawh lawm em em chuan midang, vanduai zawk naupangte tan an nunna chhanhimsak thei turin thiltihtheihna a nei tih sawiin, UNICEF hmalakna ṭawiawm turin mite a chah a ni.