Pacquiao : Pathian kohna a dawn dan a sawi

Filipino boxer ropui, khawvelin Floyd Mayweather nena an inhnek an en chak em em, Manny Pacquiao chuan a testimony sawi chhuakin, Pathian aw a hriat dan leh, a nun inthlak danglam dan a sawi chhuak. "Chhandamna kawng pakhat chiah a awm a, chu chu Isua Krista kaltlangin a ni," a ti.

The Blaze chanchinbuin an kawmnaah Manny Pacquiao chuan, "Pathian aw ka hria a, vantirhkoh pahnih ka hmu bawk a ni," tiin, a pianthar bul ṭan dan a sawi. Boxing mai bakah basketball pawh a thiam a, politician a ni bawk.

"Pathian aw ka hriat chuan ka thi ta ni hialin ka hria....ramngaw chhungah ka awm a, ka ṭhingṭhi nghal rawp rawp a, hmai lei siin ka ṭawngṭai a, tichuan êng ka hmu a, ka êng hmuh chu êng tak hi a ni; Pathian aw ka hre zui bawk a ni," a ti. Pacman hi tunah hian kum 36 mi a ni tawh a, khawvelah title hrang hrang 10 zet a la tawh.

Boxing khawvelah a hlawhtling a, kum 2013-a Forbes chanchinbuin infiammi hlawh hnem a tar chhuahah khan 14-na a ni phak hial. Hetiang khawpa mi hlawhtling hian Pathian a ṭihna leh a hnena a intukluhna chhan hi ama tih theih vang a ni lo chiang tih a hria a, "Hetiang, amah fak duhna thinlung min pek avang hian Pathian chungah ka lawm tak meuh meuh a ni," a ti.

"Khawvel zawng zawng hian chhandamna kawng pakhat chauh a awm tih hi hria se la ka duh em em a ni. Chu chhandamna chu Isua Krista kaltlang chauhin a awm a ni. Isua chanchin hi hria se, amah ring se ka duh em em a ni. Amah an rin loh chuan chhandamna an nei dawn si lo; a chhan chu Isua chauh hi chhandamna kawng awm chhun a ni," a ti.

Philippines-ah Pacman hi cong­ressman a ni a, politician a nihna bakah mipui rawng nasa takin a bawl a, biak in pawh a sa nghe nghe. "Biak in kan sa a, chênna tur nei lote tan chênna ka sa bawk," tiin a rawngbawl dan chanchin an zawhna chu a chhang. Politician ni mah se, Isua Krista chanchin puandarh chu a hna pawimawh ber a ni tih a sawi a, "Ka thil neih engkim hi Lalpa chuan mal mi sawmsak a....politic-a ka zin kawng te, a rawng ka bawlnaah leh boxer ka nihnah te hian Pathian hian keimahah hian tum a nei tih ka hria a ni. Heng zawng zawng hi ka beisei leh suangtuah phak bak a ni a, chuvang chuan hetiang dinhmun hi ka hming ni loin A hming ka puanchhuahna tur hmun leh hun a ni," a ti bawk.

UK chanchinbu lar The Guar­dian-in an kawmnaah pawh Pacman hian, "Kawng dik tak ka hmuh avangin ka lawm a, chhandam ka ni a, ka piangthar a ni...Krista chuan kan pianthar loh chuan Pathian Ramah kan lut thei lo ang tih min hrilh a, chuvang chuan ka tan chuan [piantharna hi] a pawimawh em em a ni. Isua chuan, 'Kei hi kawng leh thutak leh nunna chu ka ni. Tupawh ka hnena kal lo chuan Pa hnen an thleng lo ang,' a ti. Isua hi kawng awm chhun chu a ni," tiin a lo sawi tawh a ni.